തിരുവനന്തപുരം: ഹിന്ദു ധര്മപരിഷത്തിന്റെ അനന്തപുരി ഹിന്ദുമഹാസമ്മേളനം കോട്ടയ്ക്കകം പ്രിയദര്ശിനി ഹാളില് ആരംഭിച്ചു. അഞ്ചുദിവസം നീണ്ടുനില്ക്കുന്ന സമ്മേളനം ഗവര്ണര് ആരിഫ് മുഹമ്മദ് ഖാന് ഉദ്ഘാടനം ചെയ്തു. 
പ്രകൃതിനിയമം അനുസരിച്ചാല് ജീവിതവിജയം നിശ്ചയമാണെന്ന് അദ്ദേഹം പറഞ്ഞു. ഇന്ത്യയ്ക്ക് മാത്രമാണ് അടിത്തറയുള്ള സംസ്കാരപാരമ്പര്യമുള്ളത്. അത് ഭൂതകാലത്തെ അനുസരിക്കുന്നതുമാണ്. ധര്മ്മത്തില് അധിഷ്ഠിതമായ സംസ്കാരത്തിനുടമകളാണ് ഭാരതീയര്. അത്തരം സംസ്കാരത്തിനു മാത്രമേ സമൂഹത്തില് ഐക്യവും സമാധാനവും സൃഷ്ടിക്കാന് കഴിയുകയുള്ളൂവെന്നും ഗവര്ണര് പറഞ്ഞു.
കുടുംബങ്ങളെ ശക്തമാക്കുന്നതിലൂടെ സംസ്കാരത്തെ സംരക്ഷിക്കാന് കഴിയുമെന്ന് സ്വാമി ചിദാനന്ദപുരി പറഞ്ഞു. ചരിത്രത്തില്നിന്നു പാഠമുള്ക്കൊണ്ട സമൂഹം നിലനില്ക്കും. ഗുരുമഹിമ അറിഞ്ഞ ഭാരതം സ്വമഹിമയിലേക്കു വളരുന്നു.- അദ്ദേഹം പറഞ്ഞു. സമ്മേളനത്തിന്റെ ചെയര്മാന് ചെങ്കല് രാജശേഖരന്നായര് അധ്യക്ഷത വഹിച്ചു. ശ്രീരാമദാസ മിഷന് അദ്ധ്യക്ഷന് സ്വാമി ബ്രഹ്മപാദാനന്ദ സരസ്വതി തൃപ്പാദങ്ങള്, കുമ്മനം രാജശേഖരന്, ഒ.രാജഗോപാല്, ഹിന്ദുധര്മ പരിഷത്ത് പ്രസിഡന്റ് എം.ഗോപാല്, സമ്മേളനത്തിന്റെ ജനറല് കണ്വീനര് യുവരാജ് ഗോകുല് തുടങ്ങിയവര് സംസാരിച്ചു.
പ്രൊഫ. ബാലകൃഷ്ണന്നായര് പുരസ്കാരം ഡോ. ജി.അശോകന് ഗവര്ണര് സമര്പ്പിച്ചു. ഡോ. കസ്തൂരിബായി, ചലച്ചിത്ര സംവിധായകന് വിവേക് അഗ്നിഹോത്രി എന്നിവരെ ചടങ്ങില് ഗവര്ണര് ആദരിച്ചു. ജന്മഭൂമി എഡിറ്റര് പി.ശ്രീകുമാര് രചിച്ച കശ്മീര് ഫയല്സ് എന്ന ഗ്രന്ഥം വിവേക് അഗ്നിഹോത്രി പ്രകാശനം ചെയ്തു.
Discussion about this post