തിരുവനന്തപുരം: വേലുത്തമ്പി ദളവ സ്മാരകകേന്ദ്രത്തിന്റെ വേലുത്തമ്പിദളവ ദേശീയ പുരസ്കാരം സ്പീക്കര് എം.ബി.രാജേഷ് രമേശ് ചെന്നിത്തലയ്ക്ക് സമ്മാനിച്ചു. പാര്ലമെന്ററി മര്യാദകളില്നിന്നും അണുവിട വ്യതിചലിക്കാത്ത നേതാവാണ് രമേശ് ചെന്നിത്തലയെന്ന് സ്പീക്കര് പറഞ്ഞു. പുതിയ അംഗങ്ങള് ഇതു മാതൃകയാക്കേണ്ടതുണ്ട്. താഴേത്തട്ടില്നിന്നും പ്രവര്ത്തിച്ചുവന്ന നേതാവായതിനാല് എല്ലാ ഉത്തരവാദിത്വങ്ങളും ചെന്നിത്തലയ്ക്ക് അനായാസം നിര്വഹിക്കാന് കഴിയുന്നുണ്ട്. രാഷ്ട്രീയരംഗത്തെ തിളക്കമുള്ള നേതാവാണ് ചെന്നിത്തലയെന്നും സ്പീക്കര് പറഞ്ഞു.
അഴിമതിക്കെതിരേ പോരാടിയ വേലുത്തമ്പിദളവയുടെ പ്രതിമ ജനപ്രതിനിധികള് എന്നും കാണുന്നത് നന്നായിരിക്കുമെന്ന് രമേശ് ചെന്നിത്തല മറുപടി പ്രസംഗത്തില് പറഞ്ഞു. പുരസ്കാരദാന സമ്മേളനം സാഹിത്യകാരന് പെരുമ്പടവം ശ്രീധരന് ഉദ്ഘാടനം ചെയ്തു. ഡോ. വിളക്കുടി രാജേന്ദ്രന് മുഖ്യപ്രഭാഷണം നടത്തി. ഡോ. രാജ്മോഹന്, രാജീവ് ഗോപാലകൃഷ്ണന്, കല്ലിയൂര് ഗോപകുമാര്, ശ്രീവത്സന് നമ്പൂതിരി, വേലുത്തമ്പി ദളവ സ്മാരകകേന്ദ്രം മുഖ്യരക്ഷാധികാരി മാധവന് ബി.നായര്, ജനറല് സെക്രട്ടറി സുദര്ശന് കാര്ത്തികപ്പറമ്പില് തുടങ്ങിയവര് സംസാരിച്ചു.
Discussion about this post