കൊച്ചി: ഡീസലിനും പെട്രോളിനും പിന്നാലെ സിഎന്‍ജി വിലയും കുതിക്കുന്നു. ഒരാഴ്ചയ്ക്കിടെ കിലോയ്ക്ക് 87ല്‍നിന്ന് 91 രൂപയായാണ് വര്‍ധിച്ചത്. വിലനിയന്ത്രണത്തില്‍ ഇടപെടില്ലെന്ന് കേന്ദ്രം പ്രഖ്യാപിച്ചതിനു പിന്നാലെയായിരുന്നു വര്‍ധന. ഒരു വര്‍ഷം മുമ്പ് കിലോയ്ക്ക് 53 രൂപയായിരുന്നു. നാലുമാസത്തിനിടെ വര്‍ധിച്ചത് 16 രൂപ.
ചെലവു കുറഞ്ഞ ഇന്ധന സംവിധാനമെന്ന നിലയില്‍ സിഎന്‍ജി ആശ്രയിച്ച സാധാരണക്കാരായ ഓട്ടോറിക്ഷ തൊഴിലാളികളാണ് വില വര്‍ധനയോടെ കിതച്ചുപോയത്.
എജി. ആന്‍ഡ് പി (അറ്റ്ലാന്റിക്, ഗള്‍ഫ് ആന്‍ഡ് പസഫിക്) കമ്പനി വിതരണം ചെയ്യുന്ന ആലപ്പുഴയിലും അദാനി ഗ്രൂപ്പ് വിതരണം ചെയ്യുന്ന കൊച്ചിയിലും സിഎന്‍ജിക്ക് രണ്ടു വിലയാണ്. ആലപ്പുഴയില്‍ കിലോക്ക് 89 രൂപയും കൊച്ചിയില്‍ 91 രൂപയും. പെട്രോളിന്റെയും ഡീസലിന്റെയും വില അനിയന്ത്രിതമായി വര്‍ധിച്ച സാഹചര്യത്തില്‍ നിരവധി ഓട്ടോ- ടാക്സി വാഹനങ്ങള്‍ സിഎന്‍ജി സംവിധാനത്തിലേക്ക് മാറിയിരുന്നു.
കൊച്ചി നഗരത്തില്‍ സര്‍വീസ് നടത്തുന്ന ചില സ്വകാര്യ ബസുകളും ഇത്തരത്തില്‍ മാറുകയുണ്ടായി. ഡീസല്‍ ബസുകള്‍ സിഎന്‍ജിയിലേക്ക് മാറ്റുന്നതിനായി അഞ്ചു ലക്ഷം വരെ ചെലവാക്കിയവരുമുണ്ട്. ഇന്ധനവിലയും കോവിഡ് വരുത്തിയ സാമ്പത്തിക നഷ്ടവും മറികടക്കുന്നതിനായിരുന്നു ഈ നീക്കം. വില വര്‍ധിച്ചെങ്കിലും നിലവില്‍ ഇന്ധനക്ഷാമമില്ല.
Discussion about this post