തിരുവനന്തപുരം: വിഴിഞ്ഞം തുറമുഖത്തിനെതിരെ ലത്തീന്‍ അതിരൂപതയുടെ നേതൃത്വത്തില്‍ തിങ്കളാഴ്ച മുതല്‍ ഉപവാസ സമരം ആരംഭിക്കും. ആര്‍ച്ച് ബിഷപ്പ് തോമസ് ജെ.നെറ്റോ ഉള്‍പ്പെടെ ആറ് പേരാണ് ഉപവാസമിരിക്കുന്നത്. സമരം പാളയം ഇമാം വി.പി സുഹൈബ് മൗലവി ഉദ്ഘാടനം ചെയ്യും. ചങ്ങനാശേരി അതിരൂപത സഹായമെത്രാന്‍ തോമസ് തറയിലും സമരവേദിയിലെത്തും.
കൊല്ലങ്കോട്, പരുത്തിയൂര്‍ ഇടവകകളിലെ വിശ്വാസികളാണ് വിഴിഞ്ഞം സമരത്തിന്റെ 21-ാം ദിനത്തില്‍ പങ്കെടുക്കുക. വരും ദിവസങ്ങളില്‍ മറ്റ് വൈദികരും സന്യസ്തരും അല്‍മായരും ഉപവാസമിരിക്കും.
ഇതിനിടെ കടലാക്രമണത്തില്‍ വീട് നഷ്ടപ്പെട്ട് തിരുവനന്തപുരത്തെ തീരപ്രദേശങ്ങളിലെ ക്യാമ്പുകളില്‍ കഴിയുന്ന കുടുംബങ്ങള്‍ക്കായുള്ള ആദ്യ ഘട്ട ധനസഹായ വിതരണം തിങ്കളാഴ്ച തുടങ്ങും. വൈകിട്ട് നാലിന് മുഖ്യമന്ത്രിയാണ് ധനസഹായ വിതരണം ഉദ്ഘാടനം ചെയ്യുക. 102 കുടുംബങ്ങള്‍ക്ക് 5500 രൂപ വീതമാണ് ആദ്യം വിതരണം ചെയ്യുന്നത്.
എന്നാല്‍ ധനസഹായ വിതരണ ചടങ്ങില്‍ പങ്കെടുക്കില്ലെന്ന് ലത്തീന്‍ അതിരൂപത അറിയിച്ചു. നിസാര ധനസഹായം നല്‍കി മത്സ്യതൊഴിലാളികളെ പറ്റിക്കാനാണ് സര്‍ക്കാര്‍ ശ്രമമെന്ന് ലത്തീന്‍ അതിരൂപത ആരോപിക്കുന്നു. തുറമുഖ നിര്‍മാണം നിര്‍ത്തിവയ്ക്കുന്നത് ഉള്‍പ്പടെയുള്ള ഏഴ് ആവശ്യങ്ങളിലും പരിഹാരമാകും വരെ സമരത്തില്‍ നിന്ന് പിന്നോട്ടില്ലെന്നും ലത്തീന്‍ അതിരൂപത വ്യക്തമാക്കി.
വിഴിഞ്ഞം സമരം സംസ്ഥാനാമാകെ വ്യാപിപ്പിക്കാന്‍ കേരള റീജണല്‍ ലാറ്റിന്‍ കാത്തലിക് കൗണ്‍സില്‍ തീരുമാനിച്ചിട്ടുണ്ട് . മൂലമ്പിള്ളി ടു വിഴിഞ്ഞം എന്ന പേരില്‍ മാര്‍ച്ച് സംഘടിപ്പിക്കും. അതിനിടയില്‍ വിഴിഞ്ഞം സമരം അവസാനിപ്പിക്കാന്‍ മുഖ്യമന്ത്രി ഇടപെടണമെന്നാവശ്യപ്പെട്ട് പ്രതിപക്ഷ നേതാവിന്റെ കത്ത്. ലത്തീന്‍ സഭ ആര്‍ച്ച് ബിഷപ്പിനെയും മുന്‍ ആര്‍ച്ച് ബിഷപ്പിനെയും ഉപവാസ സമരത്തിലേക്ക് തള്ളിവിടുന്നത് ഉചിതമല്ലെന്നും വിഴിഞ്ഞം സമരം ശാശ്വതമായി പരിഹരിക്കാന്‍ സമരസമിതിയുമായി മുഖ്യമന്ത്രി നേരിട്ട് ചര്‍ച്ച നടത്തണമെന്നും വി.ഡി സതീശന്‍ ആവശ്യപ്പെട്ടു.
അതേസമയം മത്സ്യത്തൊഴിലാളികളെ കരുവാക്കി അതിരൂപത നടത്തുന്ന സമരത്തില്‍ വിഴിഞ്ഞം മൂല്ലൂര്‍ മേഖലയിലെ നാട്ടുകാര്‍ കടുത്ത പ്രതിഷേധത്തിലാണ്. അനാവശ്യസമരം കാരണം പൊറുതിമുട്ടിയ അവസ്ഥയിലാണെന്ന് വിഴിഞ്ഞം പോര്‍ട്ട് കൂട്ടായ്മ ഭാരവാഹികള്‍ പറഞ്ഞു. സര്‍ക്കാരിനെ പ്രതിരോധത്തിലാക്കി പദ്ധതി അട്ടിമറിക്കാനുള്ള നീക്കമാണെന്ന് അവര്‍ ആരോപിച്ചു. സമരം മുന്നോട്ടുപോകുന്ന സാഹചര്യത്തില്‍ രാഷ്ട്രീയഭേദമില്ലാതെ
ബദല്‍ മാര്‍ഗം തേടുമെന്നും നാട്ടുകാര്‍ പറയുന്നു.
Discussion about this post