കോഴിക്കോട്:പോപ്പുലര് ഫ്രണ്ട് സംസ്ഥാനത്ത് നടത്തുന്ന അനാവശ്യ ഹര്ത്താലിനെതിരെ സര്ക്കാര് കര്ശന നടപടി കൈക്കൊള്ളണമെന്ന് ബിജെപി സംസ്ഥാന അദ്ധ്യക്ഷന് കെ.സുരേന്ദ്രന് ആവശ്യപ്പെട്ടു. ജനങ്ങളുടെ ജീവനും സ്വത്തിനും സുരക്ഷ ഒരുക്കാന് സര്ക്കാര് തയ്യാറാകണം. തീവ്രവാദ കേസുകളെ കയ്യൂക്ക് കൊണ്ട് നേരിടാനാണ് പോപ്പുലര് ഫ്രണ്ട് ശ്രമിക്കുന്നതെന്ന് സുരേന്ദ്രന് ആരോപിച്ചു.
ഇന്ത്യ മതരാഷ്ട്രമല്ല ജനാധിപത്യ രാഷ്ട്രമാണെന്ന് പോപ്പുലര് ഫ്രണ്ട് നേതാക്കള് ഓര്ക്കണം. പോപ്പുലര് ഫ്രണ്ട് മുന്കാലങ്ങളില് നടത്തിയ ഹര്ത്താലുകളെല്ലാം കലാപത്തിലാണ് കലാശിച്ചത്. വാട്സാപ്പ് ഹര്ത്താല് നടത്തി ഒരു വിഭാഗത്തിന്റെ സ്ഥാപനങ്ങള്ക്കും ആരാധനാലയങ്ങള്ക്കുമെതിരെ ആക്രമണം നടത്തിയവര് വീണ്ടും നടത്തുന്ന ഹര്ത്താലിനെതിരെ കരുതല് നടപടി അനിവാര്യമാണ്.
സമൂഹത്തില് വിഭജനമുണ്ടാക്കാനുള്ള മതതീവ്രവാദികളുടെ നീക്കത്തിനെ തടയിടാന് ആഭ്യന്തരവകുപ്പ് തയ്യാറാകണം. രാജ്യത്ത് കേരളത്തില് മാത്രമാണ് മതഭീകരവാദികള്ക്ക് അഴിഞ്ഞാടാനുള്ള അവസരം ലഭിക്കുന്നതെന്നും ബിജെപി സംസ്ഥാന അദ്ധ്യക്ഷന് പറഞ്ഞു. അനാവശ്യ ഹര്ത്താലുകള്ക്കെതിരെ ഹൈക്കോടതി ശക്തമായ നിലപാട് എടുത്തിട്ടും സംസ്ഥാന സര്ക്കാര് പോപ്പുലര് ഫ്രണ്ടിനോട് മൃദു സമീപനം സ്വീകരിക്കുന്നത് വോട്ട്ബാങ്ക് താത്പര്യം കൊണ്ടാണെന്നും കെ.സുരേന്ദ്രന് പറഞ്ഞു.
Discussion about this post