തിരുവനന്തപുരം: കാട്ടാക്കട ബസ് ഡിപ്പോയില് കണ്സെഷന് പുതുക്കാനെത്തിയ അച്ഛനെയും മകളെയും മര്ദ്ദിച്ച സംഭവത്തില് പ്രതികളായ കെ എസ് ആര് ടി സി ജീവനക്കാരുടെ മുന്കൂര് ജാമ്യാപേക്ഷ കോടതി തള്ളി. കള്ളിക്കാട് മൈലക്കര മംഗല്യയില് മിലന് ഡോറിച്ച്, ആറാമട തേരിഭാഗം പുലരിയില് എസ്. ആര്. സുരേഷ് കുമാര്, കരകുളം കാച്ചാണി ശ്രീശൈലത്തില് എന്. അനില് കുമാര്, വീരണക്കാവ് പന്നിയോട് അജിഭവനില് അജികുമാര്. എസ്, കുറ്റിച്ചാല് ദാറുള് അമനില് മുഹമ്മദ് ഷെരീഫ് എന്നിവരുടെ ജാമ്യാപേക്ഷയാണ് ആറാം അഡീഷനല് സെഷന്സ് ജഡ്ജ് കെ.വിഷ്ണു തള്ളിയത്.സംഭവത്തിന്റെ വീഡിയോ ദൃശ്യങ്ങള് ശാസ്ത്രീയമായി പരിശോധിക്കുന്നതിന് പ്രതികളില് നിന്നും ശബ്ദവും ദൃശ്യങ്ങളും ശേഖരിക്കേണ്ടതുണ്ടെന്നും ഇതിനായി പ്രതികളുടെ കസ്റ്റഡി വേണമെന്നും പ്രോസിക്യൂഷന് കോടതിയില് ആവശ്യപ്പെടുകയായിരുന്നു.
മകളുടെ മുന്നിലിട്ട് അച്ഛനെ ക്രൂരമായി മര്ദ്ദിച്ചെന്നും തടയാന് ശ്രമിച്ച വിദ്യാര്ത്ഥിനിയായ മകളെയും മര്ദ്ദിച്ചെന്നുമാണ് കേസ്.ഇക്കഴിഞ്ഞ 20നാണ് കേസിനാസ്പദമായ സംഭവമുണ്ടായത്. ബിരുദ വിദ്യാര്ത്ഥിനിയായ മകള് രേഷ്മയുടെ കണ്സെഷന് ടിക്കറ്റ് പുതുക്കി വാങ്ങാനാണ് പൂവച്ചല് പഞ്ചായത്ത് ജീവനക്കാരന് ആമച്ചല് സ്വദേശി പ്രേമനന് എത്തിയത്. രേഷ്മയും ഒപ്പമുണ്ടായിരുന്നു. കണ്സെഷന് ലഭിക്കാന് കോഴ്സ് സര്ട്ടിഫിക്കറ്റ് വേണമെന്ന് കൗണ്ടറിലിരുന്ന ജീവനക്കാരന് പറഞ്ഞു. ഇതിനെത്തുടര്ന്നുള്ള വാക്കുതര്ക്കത്തിനൊടുവില് പ്രേമനനെ വളഞ്ഞിട്ടു തല്ലുകയായിരുന്നു.
സംഭവം നടന്നിട് ഏറെ ദിവസമായെങ്കിലും പ്രതികളെ ഇതുവരെ അറസ്റ്റുചെയ്തിട്ടില്ല. അതിനിടെ പ്രതികളെ ന്യായീകരിച്ചുകൊണ്ട് സി ഐ ടി യു രംഗത്തെത്തിയിരുന്നു.
Discussion about this post