തിരുവനന്തപുരം: നൂറാം ദിവസത്തില്‍ വിഴിഞ്ഞം സമരം കടുപ്പിച്ച് പ്രതിഷേധക്കാര്‍. തുറമുഖ കവാടത്തിന്റെ പൂട്ട് തകര്‍ത്ത പ്രതിഷേധക്കാര്‍ പദ്ധതിപ്രദേശത്ത് പ്രവേശിച്ചു. ഇവര്‍ പോലീസ് ബാരിക്കേഡുകള്‍ കടലിലെറിഞ്ഞു. നൂറുകണക്കിനു വള്ളങ്ങളിലും പ്രതിഷേധക്കാര്‍ കടലില്‍ അണിനിരന്നു. പ്രതിഷേധത്തിന്റെ സൂചകമായി കറുത്ത പുക ഉയര്‍ത്തിക്കൊണ്ടാണ് വള്ളത്തില്‍ പ്രതിഷേധം നടക്കുന്നത്. വള്ളം കത്തിച്ചും പ്രതിഷേധിച്ചിരിക്കുകയാണ്.
സമരം ഇത്രയും ദിവസം പിന്നിട്ടിട്ടും ആവശ്യങ്ങള്‍ സര്‍ക്കാര്‍ പരിഗണിക്കാമെന്ന വാഗ്ദാനമല്ലാതെ ഒന്നും നടക്കുന്നില്ലെന്നാണ് സമരക്കാരുടെ വാദം. അതേസമയം, കഴിയുന്ന ആവശ്യങ്ങള്‍ക്കെല്ലാം അനുകൂലമായ സമീപനമാണ് സ്വീകരിക്കുന്നതെന്നാണ് സര്‍ക്കാര്‍ വ്യക്തമാക്കുന്നു.
തിരുവനന്തപുരം ലത്തീന്‍ അതിരൂപതയുടെ കൊല്ലങ്കോട് മുതല്‍ വര്‍ക്കല വരെയുള്ള ഇടവകകളില്‍ നിന്നുള്ള വിശ്വാസികളും തീരദേശവാസികളുമാണ് സമരത്തിന് എത്തിയിരിക്കുന്നത്. ജൂലായ് 20ന് സെക്രട്ടേറിയറ്റില്‍ തുടങ്ങിയ സമരമാണ് ഇപ്പോള്‍ പദ്ധതിപ്രദേശത്തേക്ക് കടന്നിരിക്കുന്നത്.
അതേസമയം പ്രാദേശിക കൂട്ടായ്മയുടെ നേതൃത്വത്തില്‍ നടക്കുന്ന സമരം ശക്തമായിക്കൊണ്ടിരിക്കയാണ്. ഏതുനിമിഷവും സംഘര്‍ഷസാധ്യതയുള്ളതിനാല്‍ കനത്ത പോലീസ് സുരക്ഷയിലാണ് പദ്ധതി പ്രദേശം. സമരം രൂപം മാറുന്നതില്‍ പ്രദേശവാസികള്‍ ഏറെ ദുരിതത്തിലാണ്. സമരം മുന്നോട്ടുപോകുന്നതില്‍ പദ്ധതി പ്രദേശത്തെ ജനങ്ങള്‍ ആശങ്കാകുലരാണ്. കോടതി ഉത്തരവുകള്‍ മറികടന്നുകൊണ്ട് ഇത്തരത്തിലാണോ സമാധാനപരമായി സമരം നടത്തുന്നതെന്ന് പ്രാദേശിക കൂട്ടായ്മ ഭാരവാഹികള്‍ ചോദിച്ചു.
Discussion about this post