കൊച്ചി: ക്രമക്കേടുണ്ടെങ്കില് വൈസ് ചാന്സലര്മാരുടെ നിയമനം നിലനില്ക്കില്ലെന്ന് ഹൈക്കോടതി. അതേസമയം ചാന്സലര്ക്ക് സുപ്രീംകോടതിയോട് മറുപടി പറയാന് ബാദ്ധ്യതയുണ്ടെന്നും കോടതി പറഞ്ഞു. കാരണം കാണിക്കല് നോട്ടീസിനെതിരെ വിസിമാര് നല്കിയ ഹര്ജിയില് ഇടക്കാല ഉത്തരവ് പറയുകയായിരുന്നു കോടതി.
ഗവര്ണര് നല്കിയ കാരണം കാണിക്കല് നോട്ടീസിന് മറുപടി നല്കാനുള്ള തീയതി തിങ്കളാഴ്ച വൈകിട്ട് അഞ്ച് മണി വരെ കോടതി നീട്ടി നല്കി. എതിര് സത്യവാങ്മൂലം നല്കാന് ഗവര്ണര്ക്കും കോടതി സമയം അനുവദിച്ചു. നിലവില് രണ്ട് വി സിമാര് മറുപടി നല്കിയതായി ഗവര്ണര് കോടതിയെ അറിയിച്ചു. ഹര്ജികള് ചൊവ്വാഴ്ച വീണ്ടും പരിഗണിക്കാനും കോടതി തീരുമാനിച്ചു.
രാജി വെയ്ക്കണമെന്ന ഗവര്ണരുടെ നോട്ടീസ് നേരത്തെ റദാക്കിയിരുന്നതായി വൈസ് ചാന്സിലര്മാര് അറിയിച്ചു.ആദ്യ നോട്ടീസ് റദ്ദാക്കിയതിനാല് അത് അനുസരിച്ചില്ല എന്ന കാരണത്താല് രണ്ടാമത് നോട്ടീസ് അയക്കാന് ആകില്ല. വൈസ് ചാന്സലര് നിയമനത്തില് തെറ്റ് ഉണ്ടെങ്കിലും അത് തിരുത്താന് ചാന്സലര്ക്ക് അധികാരമില്ലെന്നും വിസി മാര് വാദിച്ചു. സുപ്രീകോടതി വിധി പ്രാവര്ത്തികം ആക്കുക മാത്രമല്ലേ ചാന്സലര് ചെയ്തുള്ളൂ എന്ന് കോടതി ചോദിച്ചു. കോടതി വിധി പ്രകാരം ചാന്സിലര്ക്കു ഇടപെടാമെന്നും ഹൈക്കോടതി പരാമര്ശിച്ചു.
കേരള സര്വകലാശാല മുന് വി സി മഹാദേവന് പിള്ള അടക്കം ഏഴ് പേരാണ് ഹൈക്കോടതിയെ സമീപിച്ചിട്ടുള്ളത്. ഗവര്ണറുടെ നടപടി നിയമപരമല്ലന്നാണ് ഹര്ജിക്കാര് പറയുന്നത്. എന്നാല് ഗവര്ണറുടെ നോട്ടീസിന് മറുപടി നല്കുകയല്ലേ വേണ്ടത് എന്നായിരുന്നു ഹൈക്കോടതി കഴിഞ്ഞ ദിവസവും ഹര്ജിക്കാരോട് ചോദിച്ചത്. യുജിസി ചട്ടം പാലിക്കാതെയുള്ള നിയമനത്തിന്റെ പേരില് സാങ്കേതിക സര്വ്വകലാശാല വൈസ് ചാന്സലറെ പുറത്താക്കിയ സുപ്രീംകോടതി ഉത്തരവിന്റെ അടിസ്ഥാനത്തിലായിരുന്നു ഒമ്പത് വി സിമാരോട് 24 മണിക്കൂറിനുള്ളില് ഗവര്ണര് രാജിവെയ്ക്കാന് ആവശ്യപ്പെട്ടത്.
Discussion about this post