തിരുവനന്തപുരം: ഗവര്‍ണര്‍ ആരിഫ് മുഹമ്മദ് ഖാനെ സര്‍വകലാശാല ചാന്‍സലര്‍ പദവിയില്‍ നിന്ന് മാറ്റാന്‍ ഓര്‍ഡിനന്‍സ് ഇറക്കാന്‍ മന്ത്രിസഭാ തീരുമാനം. ഇതിനായുള്ള ബില്‍ ഡിസംബറില്‍ ചേരുന്ന നിയമസഭാ സമ്മേളനത്തില്‍ അവതരിപ്പിച്ചേക്കും. ചാന്‍സലറായി മന്ത്രിമാരെയും വിദ്യാഭ്യാസ വിദഗ്ധരെയും പരിഗണിക്കാമെന്നും നിര്‍ദേശമുണ്ട്.
ഗവര്‍ണറെ ചാന്‍സലര്‍ പദവിയില്‍ നിന്ന് ഒഴിവാക്കാനുള്ള ബില്ലിന്റെ കരടാണ് മന്ത്രിസഭാ യോഗം പരിഗണിച്ചത്. സര്‍വകലാശാല ചാന്‍സലര്‍ സ്ഥാനത്തുനിന്നു തന്നെ ഒഴിവാക്കാന്‍ നിയമനിര്‍മാണം നടത്തിയാല്‍ താന്‍ ഒപ്പിട്ടു നല്‍കാമെന്ന ഗവര്‍ണര്‍ ആരിഫ് മുഹമ്മദ്ഖാന്റെ അഭിപ്രായത്തെത്തുടര്‍ന്നാണ് ഇതു കൊണ്ടുവരുന്നതെന്നാണു നിയമ വകുപ്പ് അധികൃതര്‍ പറയുന്നത്.
ഗവര്‍ണര്‍ ഒപ്പിട്ടാല്‍ മാത്രമേ ഇതു നിയമമാകൂ. ബില്‍ നിയമസഭ പാസാക്കിയാല്‍ രാഷ്ട്രപതിയുടെ പരിഗണനയ്ക്കു വിടുന്നതിനും രാജ്ഭവന്‍ ആലോചിക്കുന്നുണ്ട്.
വിദ്യാഭ്യാസം കേന്ദ്ര- സംസ്ഥാനങ്ങളുടെ പരിധിയില്‍ വരുന്ന കണ്‍കറന്റ് ലിസ്റ്റില്‍ ഉള്‍പ്പെട്ടതായതിനാല്‍ കേന്ദ്ര അനുമതി തേടി രാഷ്ട്രപതിയുടെ പരിഗണനയ്ക്കു വിടാന്‍ കഴിയും. യുജിസി ചട്ടലംഘനവുമായി ബന്ധപ്പെട്ട സുപ്രീംകോടതി വിധിയുടെ അടിസ്ഥാനത്തില്‍ 10 വൈസ് ചാന്‍സലര്‍മാര്‍ക്കു ഗവര്‍ണര്‍ നോട്ടീസ് നല്‍കിയിരുന്നു. ഹൈക്കോടതി വിധിയുടെ അടിസ്ഥാനത്തിലാകും ഇവരുടെ കാര്യത്തില്‍ തുടര്‍ നടപടി സ്വീകരിക്കുക.
Discussion about this post