ന്യൂഡല്‍ഹി: ഓപ്പറേഷന്‍ സിന്ദൂറില്‍ ജെയ്ഷെ തലവന്‍ മസൂദ് അസറിന്റെ സഹോദരി അടക്കം 10 കുടുംബാംഗങ്ങള്‍ കൊല്ലപ്പെട്ടതായി വിവരം. പാക് മാദ്ധ്യമങ്ങളാണ് ഇക്കാര്യം റിപ്പോര്‍ട്ട് ചെയ്തത്. നാല് സഹായികളും കൊല്ലപ്പെട്ടിട്ടുണ്ട്. കൊല്ലപ്പെട്ടവരില്‍ അസ്ഹറിന്റെ മൂത്ത സഹോദരിയും ഭര്‍ത്താവും ഉള്‍പ്പെടുന്നതായി ജെയ്ഷെ മേധാവിയുടെ പ്രസ്താവന ഉദ്ധരിച്ച് ബിബിസി ഉറുദു റിപ്പോര്‍ട്ട് ചെയ്തു.
ജെയ്ഷെ ആസ്ഥാനമായ ബഹവല്‍പൂരിലെ മര്‍കസ് സുബ്ഹാന്‍ അല്ലാഹിലാണ് മസൂദിന്റെ കുടുംബം താമസിച്ചത്. 18 ഏക്കറില്‍ വ്യാപിച്ചുകിടക്കുന്ന ഈ ക്യാമ്പ് ഉസ്മാന്‍-ഒ-അലി കാമ്പസ് എന്നും അറിയപ്പെടുന്നു. പാക് അതിര്‍ത്തിയില്‍ നിന്നും 100 കിലോമീറ്റര്‍ അകലയൊണ് കേന്ദ്രം സ്ഥിതി ചെയ്യുന്നത്. പാക് സൈന്യത്തിന്റെ സംരക്ഷണയിലാണ് സ്ഥലം.
പാകിസ്താനിലെ പന്ത്രണ്ടാമത്തെ വലിയ നഗരമാണ് ബഹവല്‍പൂര്‍. ലാഹോറില്‍ നിന്ന് 400 കിലോമീറ്റര്‍ അകലെയാണ് ഇത് സ്ഥിതി ചെയ്യുന്നത്.
സാറ്റലൈറ്റ് ചിത്രങ്ങളില്‍ സുബ്ഹാന്‍ അല്ലാഹ് ക്യാമ്പ് ഇപ്പോള്‍ വെറും അവശിഷ്ട കുമ്പാരമാണ്. ഇവിടത്തെ മസ്ജിദ് ഏതാണ്ട് പൂര്‍ണ്ണമായും തകര്‍ന്നതായും കാണാം.
ഭീകര പരിശീല കേന്ദ്രം കൂടിയാണ് മര്‍കസ് സുബ്ഹാന്‍ അല്ലാഹ്. റിക്രൂട്ട് ചെയ്യുന്ന യുവാക്കളെ ഇവിടെ എത്തിച്ചാണ് മതമൗലികവാദം കുത്തിവെച്ച് ആയുധ പരിശീലനം നല്‍കി ഭീകരന്‍മാരാക്കി മെരുക്കിയെടുക്കുന്നത്. മസൂദ് അസര്‍ ഇവിടെ സ്ഥിരം എത്താറുണ്ടെന്ന് സൈന്യം സ്ഥിരീകരിക്കുന്നു.
Discussion about this post