തിരുവനന്തപുരം : ചാന്‍സലര്‍ ബില്ലില്‍ തനിക്ക് മുകളിലുള്ളര്‍ തീരുമാനമെടുക്കട്ടെയെന്ന് ഗവര്‍ണര്‍ ആരിഫ് മുഹമ്മദ് ഖാന്‍. നയപ്രഖ്യാപനത്തിനുള്ള സര്‍ക്കാര്‍ തീരുമാനം സ്വാഗതാര്‍ഹമാണെന്നും സര്‍ക്കാരിന്റെ നടത്തിപ്പില്‍ ഒരിക്കലും ഇടപെട്ടിട്ടില്ലെന്നും അദ്ദേഹം പറഞ്ഞു.
അതേസമയം ചാന്‍സലര്‍ ബില്‍ ഒഴികെ കഴിഞ്ഞ നിയമസഭാ സമ്മേളനം പാസാക്കിയ 16 ബില്ലുകളിലും ഗവര്‍ണര്‍ ഇന്ന് ഒപ്പിട്ടു ചാന്‍സലര്‍ ബില്ലില്‍ ഗവര്‍ണര്‍ നേരത്തെ നിയമോപദേശം തേടിയിരുന്നു. ബില്ലില്‍ വിശദമായ പരിശോധന നടത്താനാണ് രാജ്ഭവന്റെ നീക്കം. യു.ജി.സിയുടെ അഭിപ്രായവും ഗവര്‍ണര്‍ തേടിയിട്ടുണ്ട്.
വിദ്യാഭ്യാസം കണ്‍കറന്റ് പട്ടികയില്‍ ഉള്ളതിനാല്‍ സംസ്ഥാനത്തിന് മാത്രമായി തീരുമാനമെടുക്കാനാകില്ല എന്നായിരുന്നു ഗവര്‍ണറുടെ നിലപാട്. ചാന്‍സലര്‍ സ്ഥാനത്ത് നീക്കുന്ന ബില്ലില്‍ അതിവേഗം തീരുമാനമില്ലെന്നും ആരിഫ് മുഹമ്മദ് ഖാന്‍ നേരത്തെ വ്യക്തമാക്കിയിരുന്നു. നിയമോപദേശത്തിന് ശേഷം ഭരണഘടനാ വിദഗ്ദ്ധകുമായി കൂടിയാലോചന നടത്തിയാകും ബില്ല് രാഷ്ട്രപതിക്ക് അയയ്ക്കുക. രാഷ്ട്രപതിയുടെ പരിഗണനയ്ക്ക് വിട്ടാല്‍ ബില്ലില്‍ ഉടനെ തീരുമാനം ഉണ്ടാകാന്‍ സാദ്ധ്യതയില്ല.
ഡിസംബര്‍ 13ന് നിയമസഭ പാസാക്കിയ ബില്‍ 22നാണ് സര്‍ക്കാര്‍ ഗവര്‍ണര്‍ക്ക് അയച്ചത്. ഒന്‍പത് ദിവസത്തിന് ശേഷം ബില്‍ സര്‍ക്കാര്‍ രാജ്ഭവന് കൈമാറുകയായിരുന്നു.
Discussion about this post