കൊച്ചി: നിയമവിരുദ്ധമായി മിന്നല് ഹര്ത്താല് നടത്തിയ പോപ്പുലര് ഫ്രണ്ടിന്റെയും അതിന് ആഹ്വാനം നല്കിയ സംഘടനാ ഭാരവാഹികളുടെയും സ്വത്ത് ജപ്തി ചെയ്തു നഷ്ടപരിഹാരം ഈടാക്കാനാണ് നിര്ദ്ദേശിച്ചതെന്നും മറ്റാരുടെയും സ്വത്ത് കോടതി ഉത്തരവിന്റെ പേരില് ജപ്തി ചെയ്യരുതെന്നും ഹൈക്കോടതി വ്യക്തമാക്കി. പോപ്പുലര് ഫ്രണ്ടുമായി ബന്ധമില്ലാത്തവരുടെ സ്വത്തും ജപ്തി ചെയ്തെന്ന് പരാതി ഉയര്ന്നിരുന്നു.
ജപ്തി നേരിട്ടവര്ക്ക് പോപ്പുലര് ഫ്രണ്ടുമായുള്ള ബന്ധം വ്യക്തമാക്കി ഫെബ്രുവരി രണ്ടിനകം ആഭ്യന്തര വകുപ്പ് അഡി. ചീഫ് സെക്രട്ടറി സത്യവാങ്മൂലം നല്കാനും ജസ്റ്റിസ് എ.കെ. ജയശങ്കരന് നമ്പ്യാര്, ജസ്റ്റിസ് സി.പി. മുഹമ്മദ് നിയാസ് എന്നിവരുള്പ്പെട്ട ഡിവിഷന് ബെഞ്ച് നിര്ദ്ദേശിച്ചു. ജപ്തി ചെയ്ത സ്വത്തുക്കളുടെ മൂല്യം സംബന്ധിച്ച വിവരങ്ങളും സത്യവാങ്മൂലത്തില് ഉള്പ്പെടുത്തണം. പോപ്പുലര് ഫ്രണ്ട് പ്രവര്ത്തകര് 2022 സെപ്തംബര് 23 നു നടത്തിയ മിന്നല് ഹര്ത്താലിലെ അക്രമങ്ങളെത്തുടര്ന്ന് സ്വമേധയാ എടുത്ത കോടതിയലക്ഷ്യക്കേസിലാണ് ഈ നിര്ദ്ദേശങ്ങള്.
കെ.എസ്.ആര്.ടി.സിക്കും സര്ക്കാരിനും സ്വകാര്യ വ്യക്തികള്ക്കുമായി 5.20 കോടി രൂപയുടെ നഷ്ടമുണ്ടായെന്ന് വിലയിരുത്തിയിരുന്നു. ഈ തുക ഈടാക്കാന് പോപ്പുലര് ഫ്രണ്ട് ഭാരവാഹികളായ 209 പേരുടെ 248 സ്വത്തുക്കളാണ് സര്ക്കാര് ജപ്തി ചെയ്തത്.
Discussion about this post