തിരുവനന്തപുരം: തെക്കന് കേരളത്തിലെ പ്രധാന ബലിതര്പ്പണ കേന്ദ്രമായ തിരുവല്ലം ക്ഷേത്രത്തിന്റെ വികസനത്തിന് ഭൂമി ഏറ്റെടുത്തു. പരശുരാമ ക്ഷേത്രത്തോട് ചേര്ന്ന് പടിഞ്ഞാറ് വശത്ത് 1.65 ഏക്കര് ഭൂമിയാണ് 5.39 കോടി മുടക്കി ഏറ്റെടുത്തത്. ഇന്ന് വൈകുന്നേരം മൂന്നുമണിക്ക് ക്ഷേത്രാങ്കണത്തില് നടക്കുന്ന ചടങ്ങില് ദേവസ്വം മന്ത്രി കെ.രാധാകൃഷ്ണന് ഭൂമിയുടെ രേഖകള് കൈമാറും. പൊതു വിദ്യാഭ്യാസ മന്ത്രി വി. ശിവന്കുട്ടി അധ്യക്ഷനാകും. തിരുവിതാംകൂര് ദേവസ്വം ബോര്ഡ് പ്രസിഡന്റ് അഡ്വ. കെ. അനന്തഗോപന് ഭൂരേഖ ഏറ്റുവാങ്ങും. ബലിക്കടവിന്റെ നവീകരണത്തിനും കൂടുതല് സൗകര്യങ്ങളേര്പ്പെടുത്തുന്നതിനും ഈ ഭൂമി വിനിയോഗിക്കുമെന്ന് മന്ത്രി പറഞ്ഞു. സ്ഥല സൗകര്യ കുറവുകള് മൂലം വര്ഷങ്ങളായി ഭക്തര് അനുഭവിച്ചിരുന്ന ബുദ്ധിമുട്ടുകള്ക്കാണ് പരിഹാരമാകുന്നത്. ബലിക്കടവ് നവീകരണത്തിനു പുറമേ പാര്ക്കിങ്ങ് സൗകര്യം, ശുചിമുറികള്, വിശ്രമമുറികള്, ക്ലോക്ക് റൂം, ലോക്കര് തുടങ്ങിയ സൗകര്യങ്ങളും ഇവിടെ നിര്മിക്കും. തിരുവല്ലം വില്ലേജില് 6 ഭൂ ഉടമകളില് നിന്നാണ് ഭൂമി ഏറ്റെടുക്കുന്നത്. ഇതു സംബന്ധിച്ച നടപടികളെല്ലാം പൂര്ത്തിയാക്കി.
എല്ലാ വിശ്വാസികളുടെയും താല്പര്യങ്ങള് സംരക്ഷിച്ചു കൊണ്ട് ക്ഷേത്രങ്ങളുടെ വികസനം സര്ക്കാര് ഉറപ്പാക്കുകയാണെന്നും ദേവസ്വം മന്ത്രി കെ. രാധാകൃഷ്ണന് വ്യക്തമാക്കി. പൊതു ജനങ്ങള്ക്കും ശബരിമല തീര്ത്ഥാടകര്ക്കും ഒരുപോലെ പ്രയോജനപ്പെടുന്ന ഇടത്താവളങ്ങളുടെ നിര്മാണം പുരോഗമിക്കുകയാണ്. ആരാധനയ്ക്കാപ്പം ആതുര സേവന സൗകര്യങ്ങളും ഏര്പ്പെടുത്തി ദേവസ്വങ്ങളെല്ലാം പൊതു സമൂഹത്തിന് കരുതലാകുകയാണ്. കാടാമ്പുഴ ക്ഷേത്രത്തിന്റെ ഭാഗമായി ഡയാലിസിസ് സെന്റര് ആരംഭിച്ചു. ഗുരുവായൂരില് സൂപ്പര് സ്പെഷ്യാലിറ്റി ആശുപത്രിയും ശബരിമല നിലയ്ക്കലില് ബേസ് ക്യാമ്പ് ഹോസ്പിറ്റലും നിര്മാണ ഒരുക്കത്തിലാണ്. പ്രധാന തീര്ത്ഥാടന കേന്ദ്രങ്ങളില് കൂടുതല് ആതുര സേവന സൗകര്യങ്ങള് ഒരുക്കുന്നത് സര്ക്കാരിന്റെ പരിഗണനയിലാണെന്നും മന്ത്രി കെ രാധാകൃഷ്ണന് കൂട്ടിച്ചേര്ത്തു.
Discussion about this post