തിരുവനന്തപുരം: മുതലപ്പൊഴിയില് മന്ത്രിമാരെ തടഞ്ഞ സംഭവത്തില് ലത്തീന് അതിരൂപത വികാരി ജനറല് ഫാ. യൂജിന് പെരേരയ്ക്കെതിരെ കേസെടുത്ത് പോലീസ്. അഞ്ചുതെങ്ങ് പോലീസാണ് സ്വമേധയ കലാപാഹ്വാനത്തിന് കേസെടുത്തത്.
കലാപാഹ്വാനത്തിനും റോഡ് ഉപരോധത്തിനുമായി രണ്ട് കേസുകളാണ് രജിസ്റ്റര് ചെയ്തത്. റോഡ് ഉപരോധിച്ച സംഭവത്തില് കണ്ടാലറിയാവുന്ന അന്പതിലധികം പേര്ക്കെതിരെയാണ് കേസ്. അഞ്ചുതെങ്ങ് മുതലപ്പൊഴിയില് മത്സ്യബന്ധന വള്ളം മറിഞ്ഞ് ഒരു മത്സ്യത്തൊഴിലാളി മരിക്കുകയും മൂന്നു പേരെ കാണാതാകുകയും ചെയ്തിരുന്നു. ഇതിനു പിന്നാലെ സ്ഥലം സന്ദര്ശിക്കാനെത്തിയ മന്ത്രിമാരായ വി. ശിവന്കുട്ടി, ആന്റണി രാജു, ജി.ആര്. അനില് എന്നിവര്ക്കെതിരേ നാട്ടുകാര് പ്രതിഷേധമുയര്ത്തിയത്. ഇതേത്തുടര്ന്നു മന്ത്രിമാര്ക്കു മടങ്ങേണ്ടി വന്നു.
രക്ഷാപ്രവര്ത്തനം വൈകുന്നു എന്ന് ആരോപിച്ചായിരുന്നു നാട്ടുകാരുടെ പ്രതിഷേധം. പിന്നീട് നാട്ടുകാര് തീരദേശ പാത ഉപരോധിക്കുകയും ചെയ്തു. സ്ഥലത്തുണ്ടായിരുന്ന ഫാ. യൂജിന് പെരേരയാണ് മന്ത്രിമാരെ തടയാന് നാട്ടുകാരെ പ്രേരിപ്പിച്ചതെന്ന് മന്ത്രി വി. ശിവന്കുട്ടി ആരോപിച്ചിരുന്നു. വിഴിഞ്ഞം സമരകാലഘട്ടത്തിലും വികാരിയുടെ ഭാഗത്തു നിന്നും സമാന നീക്കമുള്ളമുള്ളതായി നാട്ടുകാര് പറയുന്നു.
Discussion about this post