പത്തനംതിട്ട: മീനമാസ പൂജകള്‍ക്കും പൈങ്കുനി ഉത്രം മഹോത്സവത്തിനുമായി ശബരിമല നടതുറന്നു. തന്ത്രി കണ്ഠരര് മഹേഷ് മോഹനരുടെ കാര്‍മികത്വത്തില്‍ മേല്‍ശാന്തി വി.എന്‍. മഹേഷ് നമ്പൂതിരി നട തുറന്ന് ദീപം തെളിച്ചു. മീനമാസ പൂജയില്‍ പങ്കെടുക്കാനായി നിരവധി ഭക്തര്‍ സന്നിധാനത്തെത്തി. പതിനെട്ടാം പടിക്ക് മുന്നിലുള്ള ആഴിയില്‍ മേല്‍ശാന്തി അഗ്‌നി പകര്‍ന്നതോടെ ഭക്തര്‍ പതിനെട്ടാം പടികള്‍ കയറി ദര്‍ശനം നടത്തി.
ഇന്ന് പ്രത്യേക പൂജകള്‍ ഉണ്ടായിരിക്കില്ല. മീനം ഒന്നായ നാളെ പുലര്‍ച്ചെ 4.30-ന് പള്ളിയുണര്‍ത്തും. അഞ്ചിന് നിര്‍മാല്യ ദര്‍ശനം, അഭിഷേകം എന്നിവ നടക്കും. തുടര്‍ന്ന് കിഴക്കേ മണ്ഡപത്തില്‍ ഗണപതിഹോമം. 5.30 മുതല്‍ ഏഴ് വരെയും ഒമ്പത് മുതല്‍ 11 വരെയും നെയ്യഭിഷേകവും ഉണ്ടായിരിക്കും. 7.30-ന് ഉഷപൂജ, തുടര്‍ന്ന് ഉദയാസ്തമയപൂജ, 25 കലശം, കളഭാഭിഷേകം, ഉച്ചപൂജ. ഒന്നിന് നടയടയ്ക്കും.
ഈ മാസം 16-നാണ് ഈ വര്‍ഷത്തെ പൈങ്കുനി ഉത്രം ഉത്സവം നടക്കുന്നത്. രാവിലെ 8.30-നും ഒമ്പതിനും മദ്ധ്യേയുള്ള മുഹൂര്‍ത്തത്തിലാണ് കൊടിയേറ്റ്. ഉത്സവ ദിവസങ്ങളില്‍ ഉത്സവബലിയും ഉത്സവബലിദര്‍ശനവും ആനപ്പുറത്ത് എഴുന്നള്ളത്തും നടക്കും.
