കൊച്ചി: എറണാകുളത്തെ ഹോട്ടലുകളില് ഇന്നും റെയ്ഡ് തുടരുന്നു. പഞ്ചനക്ഷത്ര ഹോട്ടലുകളില് ഉള്പ്പെടെ നടത്തിയ റെയ്ഡില് പഴകിയ ഭക്ഷണസാധനങ്ങള് പിടിച്ചെടുത്തു. പറവൂര്, മരട് മേഖലയില് നടന്ന റെയ്ഡില് മുപ്പതോളം ഹോട്ടലുകള്ക്കെതിരേ നടപടിയെടുത്തു. നഗരസഭാ ഹെല്ത്ത് വിഭാഗങ്ങളുടെ നേതൃത്വത്തിലായിരുന്നു രണ്ടു സ്ഥലത്തും റെയ്ഡ്. മരട് മേഖലയിലെ ലേ മെറഡിയന്, വൈറ്റ്ഫോര്ട്ട്, ബിടിഎച്ച് സരോവരം എന്നീ മുന്തിയ ഹോട്ടലുകളിലായിരുന്നു രാവിലെ മുതല് റെയ്ഡ് നടത്തിയത്. പഴകിയ ഇറച്ചി വിഭവങ്ങള്, മീന്കറി, പച്ചക്കറി കുറുമ, രാസപഥാര്ഥങ്ങള് ചേര്ത്ത മറ്റു ഭക്ഷണ സാധനങ്ങള് എന്നിവയാണ് ഇവിടെ നിന്നും പിടിച്ചെടുത്തിട്ടുള്ളത്.
ഹോട്ടലുകളില് നിന്നും ഭക്ഷണം കഴിക്കുന്നവരും ഭക്ഷ്യപാഴ്സലുകള് വാങ്ങുന്നവരും ബില് വാങ്ങാന് മറക്കരുതെന്ന് സംസ്ഥാന ഭക്ഷ്യ സുരക്ഷാ കമ്മീഷണര് നിര്ദേശിച്ചു. കുറ്റക്കാര്ക്കെതിരെ നടപടിയെടുക്കാന് ബില് സഹായകമാണ്. ഭക്ഷ്യവിഷബാധയുണ്ടായതായി സംശയമുണ്ടായാല് അതതു ജില്ലകളിലെ ഫുഡ് സേഫ്ടി ഓഫീസറെയോ ടോള്ഫ്രീ നമ്പരായ 1800 425 1125 ലോ ബന്ധപ്പെടണമെന്നും ഭക്ഷ്യസുരക്ഷാ കമ്മീഷണര് അറിയിച്ചു.
നഗരസഭാ സെക്രട്ടറി ജയകുമാറിന്റെ നേതൃത്വത്തില് ഹെല്ത്ത് ഇന്സ്പെക്ടര് കേശവന് തമ്പി, ജൂനിയര് ഹെല്ത്ത് ഇന്സ്പെക്ടര്മാരായനിയാസ്, ഹുസൈന്, ബിജു, എന്നിവരുടെ നേതൃത്വത്തിലായിരുന്നു റെയ്ഡ്. ഹോട്ടല് വൈറ്റ്ഫോര്ട്ടില് നിന്നും പഴകിയ അച്ചാറുകളും മറ്റു ഭക്ഷണസാധനങ്ങളും പിടിച്ചെടുത്തു.
ഹോട്ടല് ലെമെറിഡിയനില് സൂക്ഷിച്ചിരുന്ന ഭക്ഷണപദാര്ഥങ്ങളില് ചേര്ക്കാന് വെച്ചിരുന്ന നിരോധിച്ച രാസപദാര്ഥങ്ങളും പിടിച്ചെടുത്തിയിട്ടുണ്ട്. ഹോട്ടല് ബിടിഎച്ച് സരോവരത്തില് നിന്നും വലിയ തോതില് പഴകിയ ഭക്ഷണം പിടിച്ചെടുത്തു. പാചകത്തിന് ഉപയോഗിക്കുന്ന പഴകിയ വസ്തുക്കളും ഇവിടെ നിന്ന് പിടിച്ചെടുത്തിട്ടുണ്ട്. റെയ്ഡ് വൈകിട്ടുവരെ തുടരും. എല്ലാത്തരം ഹോട്ടലുകളിലും റെയ്ഡ് നടത്തുമെന്നും ഹോട്ടലുടമകള്ക്കെതിരേ നിയമ നടപടികള് സ്വീകരിക്കുമെന്നും ഉദ്യോഗസ്ഥര് വ്യക്തമാക്കി.
പിടിച്ചെടുത്ത ഭക്ഷണപദാര്ഥങ്ങള് പാത്രങ്ങളിലാക്കി നഗരസഭാ ഓഫീസിനു മുന്നില് പ്രദര്ശിപ്പിച്ചിട്ടുണ്ട്.
Discussion about this post