തിരുവനന്തപുരം: ടെക്നോപാര്ക്ക് പരിസരം രാപകല് സുരക്ഷാ വലയത്തിലാക്കുമെന്ന് ആഭ്യന്തര മന്ത്രി രമേശ് ചെന്നിത്തല പറഞ്ഞു. കഴക്കൂട്ടം റെയില്വേ സ്റ്റേഷന് ഉള്പ്പെടെ പ്രദേശങ്ങള് ഇനി മുതല് പോലീസ് നിരീക്ഷണത്തിലാകും. ടെക്നോപാര്ക്ക് പോലീസ് എയ്ഡ് പോസ്റ്റില് പകല് മൂന്ന് മണി മുതല് ഒരു വനിതാ എസ്.ഐ. യുടെ സേവനം ലഭ്യമാക്കുമെന്നും അദ്ദേഹം പറഞ്ഞു. ടെക്നോപാര്ക്കില് വനിതാ സൗഹൃദ ആട്ടോറിക്ഷാ പ്രീപെയ്ഡ് കൗണ്ടര്, പോലീസ് എയ്ഡ് പോസ്റ്റ് എന്നിവയുടെ ഉദ്ഘാടനം നിര്വ്വഹിക്കുകയായിരുന്നു രമേശ് ചെന്നിത്തല.
നാല് ബൈക്കുകളിലായി ടെക്നോപാര്ക്ക് പരിസരത്ത് പോലീസ് റോന്ത് ചുറ്റും. പ്രധാന കേന്ദ്രങ്ങളില് നിരീക്ഷണ ക്യാമറകള് സ്ഥാപിച്ച് കുറ്റകൃത്യങ്ങള് ഉള്പ്പെടെയുളളവയില് നടപടി എടുക്കും. ക്യാമറകള് സ്ഥാപിക്കുന്നതിന് ജില്ലാ കളക്ടര്ക്ക് നിര്ദ്ദേശം നല്കിയിട്ടുണ്ട്. പോലീസ് എയ്ഡ് പോസ്റ്റിലേക്ക് എ.ആര്.ക്യാമ്പില് നിന്നും 20 പോലീസ് ഉദ്യോഗസ്ഥരെ നിയമിച്ചിട്ടുണ്ട്. ഇവര് മാറിമാറി ഡ്യൂട്ടിയില് ഉണ്ടാകും. തിരുവനന്തപുരം കോര്പ്പറേഷന് അതിര്ത്തി പ്രദേശങ്ങള് ചേര്ത്ത് പോലീസ് കമ്മീഷണറേറ്റ് വേണമെന്ന ആവശ്യം ചര്ച്ചയിലാണെന്നും മന്ത്രി പറഞ്ഞു. ഇത് നടപ്പിലാകാതെ വന്നാല് പോലീസ് ഡിവിഷന്റെ കാര്യം പരിഗണിക്കും. 17 ദിവസം മുമ്പ് ടെക്നോപാര്ക്ക് സന്ദര്ശിച്ചപ്പോള് എടുത്ത തീരുമാനമനുസരിച്ചാണ് പ്രീപെയ്ഡ് ആട്ടോകൗണ്ടറും എയ്ഡ് പോസ്റ്റും സ്ഥാപിച്ചതെന്നും ഇത് പോലീസിന്റെ കാര്യക്ഷമതയുടെ ഉദാഹരണമാണെന്നും മന്ത്രി പറഞ്ഞു. സ്ഥലം എം.എല്.എ. എം.എ.വാഹിദ് അധ്യക്ഷത വഹിച്ചു. മേയര് കെ.ചന്ദ്രിക ആട്ടോറിക്ഷ ഫ്ളാഗ് ഓഫ് ചെയ്തു. ജില്ലാ പോലീസ് മേധാവി രാജ് പാല് മീണ, ടെക്നോപാര്ക്ക് സി.ഇ.ഒ. ഗിരീഷ് ബാബു, ടെക്നോപാര്ക്ക് ഉദ്യോഗസ്ഥര് തുടങ്ങിയവര് സംബന്ധിച്ചു.
Discussion about this post