തിരുവനന്രാതപുരം: ഇന്ത്യയില്‍ മതിയായ തൊഴിലവസരങ്ങളുണ്ടായിട്ടും സ്ത്രീകള്‍ വിദേശരാജ്യങ്ങളില്‍ ജോലി തേടിപ്പോകുന്നതിന്റെ കാരണങ്ങള്‍ മനസിലാക്കാന്‍ ശ്രമിക്കണമെന്ന് ഗവര്‍ണര്‍ ഷീലാ ദീക്ഷിത് ആവശ്യപ്പെട്ടു. ദേശീയ വനിതാ കമ്മിഷനും സംസ്ഥാന വനിതാ കമ്മിഷനും സംയുക്തമായി തിരുവനന്തപുരത്ത് സംഘടിപ്പിച്ച ദ്വിദിന ദേശീയ സെമിനാര്‍ ഉദ്ഘാടനം ചെയ്തു സംസാരിക്കുകയായിരുന്നു ഗവര്‍ണര്‍. സ്ത്രീകള്‍ ലോകത്തിന്റെ ഏതുഭാഗത്തും വിവേചനങ്ങള്‍ക്കിരയാവുകയാണ്. മെച്ചപ്പെട്ട തൊഴിലും ഉയര്‍ന്ന വേതനവും പ്രതീക്ഷിച്ച് പുറം രാജ്യങ്ങളിലേക്ക് പോകുന്ന സ്ത്രീകള്‍ വിവിധതരം ചൂഷണങ്ങള്‍ക്കും ഇരയാവുന്നു. രാജ്യത്തിനുള്ളിലും സ്ത്രീകള്‍ക്ക് അര്‍ഹമായവ നിഷേധിക്കുന്നു. അതേ സമയം അവകാശങ്ങള്‍ക്കും തുല്യനീതിക്കും വേണ്ടി സ്ത്രീകള്‍ ശബ്ദമുയര്‍ത്തിയാല്‍ അത് അവഗണിക്കാന്‍ സമൂഹത്തിന് കഴിയില്ലെന്ന് ഗവര്‍ണര്‍ കൂട്ടിച്ചേര്‍ത്തു. പുറം രാജ്യങ്ങളില്‍ തൊഴില്‍ തേടിപ്പോവുന്നവരുടെ പ്രശ്‌നങ്ങള്‍ പരിഹരിക്കാന്‍ പ്രത്യേക നയതന്ത്ര സെല്ലുകള്‍ ആരംഭിക്കണമെന്ന് ചടങ്ങില്‍ അദ്ധ്യക്ഷത വഹിച്ച മുഖ്യമന്ത്രി ഉമ്മന്‍ ചാണ്ടി പറഞ്ഞു. അടിയന്തിര സാഹചര്യങ്ങളെ നേരിടാനുള്ള കര്‍മ്മ പദ്ധതിയുമുണ്ടാവണം. വിദേശങ്ങളില്‍ ജോലി ചെയ്യുന്ന മലയാളികള്‍ക്കായി നോര്‍ക്ക നിരവധി നടപടികള്‍ സ്വീകരിച്ചുവരുന്നുണ്ടെന്നും മുഖ്യമന്ത്രി പറഞ്ഞു. അന്യ സംസ്ഥാനത്തൊഴിലാളികള്‍ കേരളത്തിന്റേ വികസനപ്രക്രിയയില്‍ നിര്‍ണ്ണായകമായ സംഭാവനകളാണ് നല്‍കുന്നത്. കേരളത്തെ സംബന്ധിച്ചിടത്തോളം അന്യസംസ്ഥാനത്തു നിന്നും തൊഴില്‍തേടിയെത്തുന്നവരുടെ പ്രശ്‌നങ്ങളും പരിഹരിക്കേണ്ടതുണ്ടെന്നും മുഖ്യമന്ത്രി പറഞ്ഞു. തൊഴില്‍ തേടി ഇന്ത്യയില്‍ നിന്ന് വിദേശരാജ്യങ്ങളിലെത്തുന്ന സ്ത്രീകളുടെ പ്രശ്‌നങ്ങളും സുരക്ഷയും എന്ന വിഷയത്തില്‍ സംഘടിപ്പിച്ച ദ്വിദിന സെമിനാറിന്റെ ഉദ്ഘാടനച്ചടങ്ങില്‍ മന്ത്രി ഡോ.എം.കെ.മുനീര്‍ മുഖ്യപ്രഭാഷണം നടത്തി. വനിതാ കമ്മിഷന്‍ അദ്ധ്യക്ഷ കെ.സി.റോസക്കുട്ടി, ദേശീയ വനിതാ കമ്മിഷന്‍ അംഗങ്ങളായ ഡോ.ചാരു വാലിഖന്ന, ഷാമിനാ ഷഫീക്ക്, ആന്ധ്രാപ്രദേശ് വനിതാ കമ്മിഷന്‍ അദ്ധ്യക്ഷ ഡോ.ത്രിപുരാനാ വെങ്കട്ടരത്‌നം, സംസ്ഥാന വനിതാ കമ്മിഷന്‍ സെക്രട്ടറി കെ.കെ.പ്രസന്ന കുമാര്‍ തുടങ്ങിയര്‍ പങ്കെടുത്തു.
വനിതാ കമ്മിഷന്റെ ദ്വിദിന ദേശീയ സെമിനാറിന് തുടക്കമായി
പുതിയ വാർത്തകൾ
Discussion about this post