തിരുവനന്തപുരം: കേരളത്തിലെ ജയിലുകളിലുളള 7,300 ഓളം അന്തേവാസികളില്‍ പത്ത്‌ ശതമാനത്തോളം പേര്‍ നിരക്ഷരരാണെന്നും അവരെക്കൂടി സാക്ഷരരാക്കാനുളള നടപടികള്‍ ആരംഭിച്ചുവെന്നും ജയില്‍ ഡി.ജി.പി. റ്റി.പി. സെന്‍കുമാര്‍ പറഞ്ഞു. വായനാശീലം വളര്‍ത്തിയെടുക്കുന്നതിലൂടെ മാത്രമേ മാനസികവും ആത്മീയവുമായ വളര്‍ച്ച നേടാനാകൂ. ജയില്‍ അന്തേവാസികളില്‍ മാനസികപരിവര്‍ത്തനമുണ്ടാക്കുന്നതിന്‌ അക്ഷരജ്ഞാനവും ആഴത്തിലുളള വായനയും ആവശ്യമാണെന്നും അദ്ദേഹം കൂട്ടിച്ചേര്‍ത്തു.
വായനാവാരാഘോഷങ്ങളുടെ ഭാഗമായി പൂജപ്പുര സെന്‍ട്രല്‍ ജയിലില്‍ സംഘടിപ്പിച്ച വായനോത്സവം ഉദ്‌ഘാടനം ചെയ്യുകയായിരുന്നു അദ്ദേഹം. ശിക്ഷാകാലാവധി കഴിഞ്ഞ്‌ ജയിലില്‍ നിന്ന്‌ പുറത്തുപോകുന്ന വ്യക്തികള്‍ക്ക്‌ തുടര്‍ന്ന്‌ നല്ല ജീവിതം നയിക്കാനുതകുന്ന തരത്തില്‍ അനുയോജ്യമായ തൊഴില്‍പരിശീലനം നല്‍കാന്‍ പദ്ധതി ആവിഷ്‌ക്കരിച്ചിട്ടുണ്ട്‌. ഒരുമാസത്തിനുളളില്‍ സെന്‍ട്രല്‍ ജയിലില്‍ പുകവലി പൂര്‍ണ്ണമായും നിരോധിക്കുമെന്നും അദ്ദേഹം അറിയിച്ചു. ജയില്‍ ഓഡിറ്റോറിയത്തില്‍ നടന്ന ചടങ്ങില്‍ അന്തേവാസികള്‍ക്ക്‌ അദ്ദേഹം വായനാദിന പ്രതിജ്ഞ ചൊല്ലിക്കൊടുത്തു. മാനസികദൗര്‍ബല്യങ്ങള്‍ മാറ്റാനുളള ആശുപത്രിയായി ജയിലിനെ കാണണമെന്നും ജയിലിലെ ലൈബ്രറിയിലൂടെ അറിവ്‌ നേടി പുത്തന്‍മനുഷ്യരായി സമൂഹത്തിലേയ്‌ക്ക്‌ തിരിച്ചുപോകണമെന്നും ചടങ്ങില്‍ അധ്യക്ഷത വഹിച്ച പി.എന്‍. പണിക്കര്‍ ഫൗണ്ടേഷന്‍ വൈസ്‌ ചെയര്‍മാന്‍ എന്‍. ബാലഗോപാല്‍ ജയില്‍ അന്തേവാസികളെ ഉദ്‌ബോധിപ്പിച്ചു.
ജയില്‍ ഡി.ഐ.ജി. എച്ച്‌. ഗോപകുമാര്‍, ജയില്‍ സൂപ്രണ്ട്‌ സാം തങ്കയ്യന്‍, ചീഫ്‌ വെല്‍ഫയര്‍ ഓഫീസര്‍ കെ. കുമാരന്‍ തുടങ്ങിയര്‍ സംസാരിച്ചു.
Discussion about this post