തിരുവനന്തപുരം: ഗുരുവായൂര് ഔട്ടര്റിംഗ് റോഡില് ഇപ്പോള് നടന്നുവരുന്ന അഴുക്കുചാല് നിര്മ്മാണ പ്രവര്ത്തനങ്ങള് ഈ മാസം 31 നകം പൂര്ത്തിയാക്കണമെന്ന് മുഖ്യമന്ത്രി ഉമ്മന്ചാണ്ടി ആവശ്യപ്പെട്ടു. നിയമസഭയിലെ ചേംബറില് വിളിച്ചു ചേര്ത്ത പ്രത്യേക യോഗത്തിലാണ് മുഖ്യമന്ത്രി ഇക്കാര്യം ആവശ്യപ്പെട്ടത്.
പദ്ധതി പ്രകാരം വാട്ടര് അതോറിറ്റിയാണ് കരാറുകാര് വഴി നിര്മ്മാണ പ്രവര്ത്തനങ്ങള് നടത്തുന്നത്. പി.ഡബ്ല്യു.ഡി. ഔട്ടര് റിംഗ് റോഡില് പമ്പിംഗ് സ്റ്റേഷന് ഒന്നു മുതല് പോലീസ് സ്റ്റേഷന് റോഡ് ജംഗ്ഷന് വരെയുളള ഭാഗത്ത് 30 മീറ്റര് ദൂരത്താണ് ഇപ്പോള് പ്രവൃത്തി നടക്കുന്നത്. ഇത് ഈ മാസം 31 നകം പൂര്ത്തിയാക്കി റോഡ് സഞ്ചാര യോഗ്യമാക്കണമെന്നും മുഖ്യമന്ത്രി ആവശ്യപ്പെട്ടു. പി.ഡബ്ല്യു.ഡി. റോഡില് 1555 മീറ്ററും ദേവസ്വം റോഡില് 695 മീറ്ററുമടക്കം 2250 മീറ്റര് ദൂരം ഇനിയും പൈപ്പുകള് സ്ഥാപിക്കേണ്ടതുണ്ട്. ഇതിന്റെ പ്രവര്ത്തനങ്ങള് സമയബന്ധിതമായി പൂര്ത്തിയാക്കണം. പല സ്ട്രെച്ചുകളായി തിരിച്ച് പൈപ്പ് സ്ഥാപിക്കുകയും റോഡ് പുനസ്ഥാപിക്കുകയും ചെയ്യുന്ന നിര്മ്മാണ രീതിയാവണം സ്വീകരിക്കേണ്ടതെന്നും മുഖ്യമന്ത്രി നിര്ദ്ദേശിച്ചു. ഗുരുവായൂര് പട്ടണത്തിന്റെ പ്രത്യേക സാഹചര്യങ്ങള് മൂലമാണ് വേഗത്തില് പ്രവൃത്തി നടത്താനാവാത്തത്. റോഡുകളില് സ്ഥാപിച്ചിട്ടുളള കുടിവെളള പൈപ്പുകള് ടെലിഫോണ് കേബിളുകള് വൈദ്യുതി കേബിളുകള് എന്നിവയുടെ സ്ഥാനങ്ങള് കണ്ടെത്തി കേടുപാടുകള് വരാതെ പ്രവൃത്തികള് ചെയ്തുവരുന്നതും ഉദ്ദേശിച്ച വേഗതയില് പണി പൂര്ത്തിയാക്കാനാവാത്തതിന് കാരണമാകുന്നുണ്ടെന്നും വാട്ടര് അതോറിറ്റി ഉദ്യോഗസ്ഥര് യോഗത്തില് വ്യക്തമാക്കി. നിലവില് നടക്കുന്ന പ്രവൃത്തിയുടെ പുരോഗതി ജലവിഭവ വകുപ്പ് അഡീഷണല് ചീഫ് സെക്രട്ടറി വി.ജെ.കുര്യന്, പി.ഡബ്ല്യു.ഡി. സെക്രട്ടറി ടി.ഒ.സൂരജ് എന്നിവരുടെ നേതൃത്വത്തിലുള്ള ഉന്നതതല സംഘം നേരില് വിലയിരുത്താനും തീരുമാനമായി. മുഖ്യമന്ത്രി ഉമ്മന്ചാണ്ടിയുടെ അധ്യക്ഷതയില് ചേര്ന്ന യോഗത്തില് മന്ത്രിമാരായ പി.ജെ.ജോസഫ്, ഇബ്രാഹിംകുഞ്ഞ്, മഞ്ഞളാംകുഴി അലി, കെ.വി.അബ്ദുള്ഖാദര് എം.എല്.എ., ഗുരുവായൂര് ദേവസ്വം ബോര്ഡ് പ്രസിഡന്റ് ടി.വി. ചന്ദ്രമോഹന് തുടങ്ങിയവര് പങ്കെടുത്തു.
Discussion about this post