ന്യൂഡല്‍ഹി: ഇറാക്കിലെ കലാപബാധിത പ്രദേശമായ മൊസൂളില്‍ നിന്നും മലയാളി നഴ്‌സുമാരെ മോചിപ്പിക്കുന്നതിനു കേന്ദ്ര സര്‍ക്കാര്‍ വിദേശ രാജ്യങ്ങളുടെ സഹായം തേടി. ഗള്‍ഫ് രാജ്യങ്ങളുമായാണ് കേന്ദ്ര വിദേശകാര്യ മന്ത്രി സുഷമ സ്വരാജിന്റെ നേതൃത്വത്തില്‍ ചര്‍ച്ച നടത്തുന്നത്. ഐക്യരാഷ്ട്രസഭ അടക്കമുള്ള അന്താരാഷ്ട്ര ഏജന്‍സികളെ പ്രശ്‌നത്തില്‍ ഇടപെടീക്കാന്‍ നീക്കം തുടങ്ങിയിട്ടുണ്ട്.
യുഎഇ, ബഹറിന്‍, കുവൈറ്റ്, ഖത്തര്‍ എന്നീ രാജ്യങ്ങളുമായാണ് നഴ്‌സുമാരെ മോചിപ്പിക്കുന്നതിനു മധ്യസ്ഥത വഹിക്കാമോ എന്നു ഒമാന്‍, ജോര്‍ദാന്‍, തുര്‍ക്കി എന്നീ രാജ്യങ്ങളുടെ സഹായവും ഇക്കാര്യത്തില്‍ സര്‍ക്കാര്‍ തേടിയിട്ടുണ്ട്. ഇറാക്കില്‍ കലാപം നടത്തുന്ന വിമത സുന്നി വിഭാഗത്തിനു മുന്‍ ഭരണാധികാരി സദ്ദാം ഹുസൈനുമായി അടുത്ത ബന്ധമുള്ള രാജ്യങ്ങള്‍ എന്ന നിലയിലാണ് ഈ ഗള്‍ഫ് രാജ്യങ്ങളുമായി ചര്‍ച്ച നടത്തുന്നത്. എന്നാല്‍, ഇതുസംബന്ധിച്ച ഒരു ഉറപ്പും സര്‍ക്കാരിനു ലഭിച്ചിട്ടില്ലെന്നാണ് സൂചന. അതേസമയം, മൊസൂളിലെ അല്‍ജിഹാരി ആശുപത്രിക്കടുത്തുള്ള പഴയ കെട്ടിടത്തില്‍ താമസിപ്പിച്ചിരിക്കുന്ന നഴ്‌സുമാരെ മോചിപ്പിക്കാമെന്നു വിമതര്‍ അറിയിച്ചതായാണു സൂചന. നഴ്‌സുമാരെ ഇക്കാര്യം ബന്ധുക്കളെ അറിയിച്ചിട്ടുണ്ട്. എന്നാല്‍, ഇതു എപ്പോള്‍ സംഭവിക്കുമെന്നു ഒരു ഉറപ്പും ലഭിച്ചിട്ടില്ല.
നീണ്ട യാത്രയ്ക്കുശേഷം മൊസൂളിലെത്തിച്ച നഴ്‌സുമാരുടെ അവസ്ഥ മോശമായസ്ഥിതിയിലാണ്. ഇന്നലെ പരിക്കേറ്റവര്‍ക്കു വൈദ്യസഹായം ലഭിച്ചിട്ടില്ലെന്നും അറിയുന്നു. എന്നാല്‍, വിമത സുന്നി വിഭാഗം തങ്ങളോടു അനുഭാവപൂര്‍വമാണ് പെരുമാറുന്നതെന്നു നഴ്‌സുമാരുടെ സന്ദേശത്തില്‍ വ്യക്തമാക്കുന്നു. നഴ്‌സുമാരെ വിമതസൈന്യം പൂട്ടിയിട്ടിരിക്കുകയാണെന്നാണ് വിവരം. ഇവരെ പാര്‍പ്പിച്ച മുറിക്ക് കാവലുണ്ട്. പാര്‍പ്പിച്ചിരിക്കുന്ന കെട്ടിടത്തില്‍ വെളിച്ചമില്ലെന്നാണ് നഴ്‌സുമാര്‍ ബന്ധുക്കളോട് പറഞ്ഞിരിക്കുന്നത്.
Discussion about this post