ന്യൂഡല്‍ഹി: ഇറാക്കിലെ മൊസൂളിലെത്തിച്ച മലയാളി നഴ്‌സുമാരെ ഇന്ത്യയിലെത്തിക്കാന്‍ പ്രത്യേക വിമാനം സജ്ജമാക്കുമെന്നു മുഖ്യമന്ത്രി ഉമ്മന്‍ ചാണ്ടി. കേന്ദ്ര വിദേശകാര്യ മന്ത്രാലയവുമായി ഇക്കാര്യം ചര്‍ച്ച ചെയ്തിട്ടുണെ്ടന്നും പ്രത്യേക വിമാനം സജ്ജമാക്കുമെന്നു കേന്ദ്രസര്‍ക്കാര്‍ ഉറപ്പു നല്‍കിയതായും മുഖ്യമന്ത്രി അറിയിച്ചു. സംഘര്‍ഷ മേഖലയില്‍ കുടുങ്ങിക്കിടക്കുകയാണെങ്കിലും മടങ്ങിവരുന്നതിനെ ചില മലയാളികള്‍ എതിര്‍ത്തതാണു രക്ഷപ്പെടുത്തല്‍ നടപടികളില്‍ ആശയക്കുഴപ്പമുണ്ടായതെന്നും അദ്ദേഹം വ്യക്തമാക്കി.
കലാപമുണ്ടായ സമയത്തു മലയാളികള്‍ അടക്കമുള്ളവരെ സുരക്ഷിതമായ മേഖലയില്‍ എത്തിക്കാന്‍ അവസരമുണ്ടായിട്ടും ചിലര്‍ മടങ്ങിവരുന്നതില്‍ എതിര്‍പ്പ് അറിയിച്ചതാണു നടപടികള്‍ക്ക് കാലതാമസമുണ്ടാക്കിയത്. അക്കാര്യത്തില്‍ വ്യക്തതയുണ്ടായപ്പോഴേക്കും സ്ഥിതി ഗുരുതരമായി. റെഡ് ക്രസന്റ്, റെഡ് ക്രോസ് എന്നീ സന്നദ്ധ സംഘടനകള്‍ സ്ഥലത്തുണ്ടായിരുന്നെങ്കിലും ഇവരെ സുരക്ഷിതസ്ഥാനത്ത് എത്തിക്കുന്ന പ്രവര്‍ത്തനങ്ങള്‍ ഇവരിലൂടെ സാധ്യമാകുമായിരുന്നില്ല. ഐക്യരാഷ്ട്ര സംഘടനയ്ക്ക് ഇക്കാര്യത്തില്‍ എന്തെങ്കിലും ചെയ്യാന്‍ അവസരമുണ്ടെങ്കിലും അവര്‍ കാര്യക്ഷമമായി ഇവിടെ ഇടപെട്ടിട്ടില്ല. മലയാളികള്‍ അടക്കമുള്ളവരെ സുരക്ഷിതമായി എത്തിക്കുന്നതിനാണു കൂടുതല്‍ പ്രാധാന്യം നല്‍കുന്നത്. അവര്‍ സുരക്ഷിതരാണെന്നും രണ്ടോ മൂന്നോ പേര്‍ക്കു മാത്രമാണ് ചില്ല് പൊട്ടിയതു മൂലം പരിക്കേറ്റതെന്നും അദ്ദേഹം വ്യക്തമാക്കി.
അതേസമയം, ബംഗ്ലാദേശ് സര്‍ക്കാര്‍ മുന്നിട്ടിറങ്ങി തങ്ങളുടെ ആളുകളെ രക്ഷപ്പെടുത്തിയെന്ന റിപ്പോര്‍ട്ടുകളും പൂര്‍ണമായും ശരിയല്ലെന്നും മുഖ്യമന്ത്രി ഉമ്മന്‍ ചാണ്ടിയും ആഭ്യന്തരമന്ത്രി രമേശ് ചെന്നിത്തലയും അറിയിച്ചു. മടങ്ങിവരുന്നവരെ പുനരധിവസിപ്പിക്കുന്നതു സംബന്ധിച്ച നടപടികള്‍ പിന്നീട് ആലോചിക്കുമെന്നും മുഖ്യമന്ത്രി ചോദ്യത്തിനു മറുപടി നല്‍കി.
