വിതുര: കാട്ടുതീ പടരുന്നത് തടയുന്നതിനുള്ള ആധുനിക ഉപകരണങ്ങള് വനംവകുപ്പില് അടയിന്തരമായി വാങ്ങണമെന്ന് കേരള ഫോറസ്റ്റ് സ്റ്റാഫ് അസോസിയേഷന് ജില്ലാ പ്രവര്ത്തകയോഗം ആവശ്യപ്പെട്ടു. ഇക്കൊല്ലം മഴ കുറവായതിനാല് കാട്ടുതീ രൂക്ഷമാകാനാണ് സാധ്യത.
പരമ്പരാഗത രീതി മാത്രമാണ് കാട്ടുതീ ചെറുക്കാന് ഇന്നും വനപാലകര് ആശ്രയിക്കുന്നത്. ഈ മാര്ഗങ്ങള് കാരണം ഓരോവര്ഷവും നഷ്ടമാകുന്നത് അമൂല്യമായ ജൈവസമ്പത്താണെന്ന് യോഗം വിലയിരുത്തി. ഇത്തവണ കാട്ടുതീ സീസണ് തുടങ്ങും മുമ്പ് കാലേകൂട്ടി ആധുനിക അഗ്നി പ്രതിരോധ ഉപകരണങ്ങള് വാങ്ങണം. പോലീസ് കാന്റീന് മാതൃകയില് വനപാലകര്ക്ക് കാന്റീന് സൗകര്യം ഏര്പ്പെടുത്തണമെന്നും ജില്ലയില് ഫോറസ്റ്റ് സ്റ്റേഷന് സംവിധാനം തുടങ്ങണമെന്നും യോഗം ആവശ്യപ്പെട്ടു.
ജില്ലാ പ്രസിഡന്റ് ജി. പ്രഭാകരന് നായരുടെ അധ്യക്ഷതയില് വിതുര കോണ്ഗ്രസ് ഹൗസില് കൂടിയ യോഗം സംസ്ഥാന കോഓര്ഡിനേറ്റര് ജിതേഷ് ബലറാം ഉദ്ഘാടനം ചെയ്തു. ജില്ലാ സെക്രട്ടറി എ. മുഹമ്മദ്റാഫി, പി.കെ. വേണുഗോപാല്, എ. സലിം, എം. ഗംഗാധരന്കാണി, എസ്. കമറുദ്ദീന് എന്നിവര് സംസാരിച്ചു.
