തിരുവനന്തപുരം: റോഡ് അപകടങ്ങള് വര്ധിച്ചു വരുന്ന സാഹചര്യത്തില് സുരക്ഷാ സംവിധാനങ്ങള് കാര്യക്ഷമമാണെന്ന് ഉറപ്പു വരുത്തുമെന്ന് ആഭ്യന്തരമന്ത്രി രമേശ് ചെന്നിത്തല. ട്രാഫിക്ക് നിയമങ്ങള് കര്ശനമായി നടപ്പിലാക്കാന് അദ്ദേഹം ഉദ്യോഗസ്ഥര്ക്ക് നിര്ദ്ദേശം നല്കി. സംസ്ഥാനത്തെ ട്രാഫിക് പ്രശ്നങ്ങളെ കുറിച്ച് ചര്ച്ചചെയ്യാന് വിളിച്ചു ചേര്ത്ത ഉന്നതതല യോഗത്തിലാണ് തീരുമാനം.
റോഡ് സുരക്ഷക്കും ഗതാഗത നിയന്ത്രണത്തിനുമായി സ്ഥാപിച്ചിരിക്കുന്ന സിഗ്നലുകളുടെ പ്രവര്ത്തനം കാര്യക്ഷമാക്കും. ഹംബുകള് ദൂരരെനിന്നുതന്നെ കാണുന്ന രീതിയില് ചിഹ്നങ്ങളും അടയാളങ്ങളും രേഖപ്പെടുത്തും. എല്ലാ ഡിവൈഡറുകളിലും റിഫ്ളക്ടറുകള് സ്ഥാപിക്കുന്നതിനും ഡിവൈഡര് അകലെ നിന്നു തന്നെ തിരിച്ചറിയാന് അവയ്ക്ക് മുന്നില് ത്രികോണ അടയാളമിടാനും നിര്ദ്ദേശം നല്കി. നിലവില് ഡിവൈഡറില്ലാത്ത വീതിയുള്ള റോഡുകളില് ഡിവൈഡറുകള് സ്ഥാപിക്കും. റോഡ് സുരക്ഷാ അടയാളങ്ങളും ദിശാ ബോര്ഡുകളും കാണാന് കഴിയാത്ത രീതിയില് മറയ്ക്കുന്ന മരചില്ലകളും ഫ്ളക്സ് ബോര്ഡുകളും നീക്കം ചെയ്യും. മദ്യപിച്ച് വാഹനമോടിക്കുന്നവരെയും വാഹനമോടിക്കുമ്പോള് മൊബൈല് ഫോണ് ഉപയോഗിക്കുന്നവര്ക്കെതിരെയും കര്ശനമായ നിയമ നടപടി സ്വീകരിക്കും. അമിതവേഗത്തിത്തിലും അനുവദിച്ച സമയ പരിധി ലംഘിച്ചും ഓടിക്കുന്ന ടിപ്പര് ലോറികളും, ജെ സി ബികളും കസ്റ്റഡിയില് എടുക്കും. സിഗ്നലുകളും ട്രാഫിക് നിയന്ത്രണ രേഖകളും തെറ്റിച്ച് വാഹനമോടിക്കുന്നവരില് നിന്നും പിഴയിടാനും യോഗത്തില് തീരുമാനമായി.
ഹൈവേയിലുടെയും ബൈപാസുകളിലൂടെയുമുള്ള മത്സരയോട്ടം നടത്തുന്നവര്ക്കെതിരെ ശക്തമായ നടപടി സ്വീകരിക്കാന് പൊലീസിന് നിര്ദേശം നല്കി. ഹൈസ്പീഡ് ബൈക്ക് റേസിംഗുകാര്ക്കെതിരെയും കര്ശന നടപടിയുണ്ടാകും. സ്കൂള് ജംഗ്ഷനുകളില് രാവിലെയും വൈകുന്നേരവും ട്രാഫിക്ക് വാര്ഡന്മാരെയും ഹോംഗാര്ഡുകളെയും നിയമിക്കും. വിദ്യാഭ്യാസ സ്ഥാപനങ്ങളില് ഫിറ്റ്നസില്ലാതെ ഉപയോഗിക്കുന്ന വാഹനങ്ങള് പിടിച്ചെടുക്കും. പത്ത് വര്ഷത്തിലധികം പഴക്കമുള്ള ബസുകള് ആറു മാസത്തിലൊരിക്കല് ഫിറ്റ്നസ് പരിശോധനക്ക് വിധേയമാക്കും പ്രവര്ത്തനക്ഷമമല്ലാത്ത ക്യാമറകള് ഉടന് മാറ്റി സ്ഥാപിക്കാനും ആഭ്യന്തരമന്ത്രി ഉദ്യോഗസ്ഥര്ക്ക് നിര്ദ്ദേശം നല്കി.
ആഭ്യന്തര സെക്രട്ടറി നിവേദിതാ പി ഹരന്, ട്രാന്സ്ഫോര്ട്ട് കമ്മീഷ്ണര് ശ്രീലേഖ, എ ഡി ജി പി മാരായ എം എന് കൃഷ്ണമൂര്ത്തി, എ ഹേമചന്ദ്രന്, കെ പത്മകുമാര്, ലോക്നാഥ് ബഹ്റ, ജോയിന്റ് ട്രാന്സ്ഫോര്ട്ട് കമ്മീഷ്ണര് ശ്രീകുമാര്, പൊലീസ് ട്രെയിനിംഗ് കോളേജ് പ്രിന്സിപ്പല് വി ഗോപാലകൃഷ്ണന്, ജെ ജെ ജോസ് ഐ ജി, ട്രാഫിക് എസ് പി സക്കറിയ ജോര്ജ്, റോഡ് സേഫ്റ്റി എക്സിക്യൂട്ടിവ് എന്ജിനിയര് ശിവപ്രസാദ് തുടങ്ങിയ ഉദ്യോഗസ്ഥരും യോഗത്തില് പങ്കെടുത്തു.
Discussion about this post