തിരുവനന്തപുരം: ഗാര്ഹികാവശ്യങ്ങള്ക്കായി റോഡു കുഴിച്ചശേഷം നിശ്ചിതസമയത്തിനുള്ളില് റോഡ് പുന:സ്ഥാപിച്ചില്ലെങ്കില് അത് പരിഹരിക്കാനുള്ള ചെലവ് റവന്യൂറിക്കവറി നടപടികള് മുഖേന ഗുണഭോക്താവില് നിന്നും ഈടാക്കുമെന്ന് ജില്ലാകളക്ടര് അറിയിച്ചു. ടാര് കട്ടിംഗിനു ശേഷം റോഡ് പുനസ്ഥാപിക്കുന്ന ജോലി ചെയ്യുമ്പോള് കോണ്ക്രീറ്റ് ഉപയോഗിക്കണം. ഇതിനുള്ള ചെലവും ഗുണഭോക്താവില് നിന്നും ഈടാക്കും.
റോഡ് പുന:സ്ഥാപിക്കുന്ന ജോലിക്ക് ഉപയോഗിക്കേണ്ട കോണ്ക്രീറ്റ് മിശ്രിതം 1:2:4 എന്ന അനുപാതത്തില് ആയിരിക്കണം. കുഴി മൂടുന്നതിനുള്ള കോണ്ക്രീറ്റിന്റെ കനം ഏറ്റവും കുറഞ്ഞത് 15 സെന്റിമീറ്റര് എങ്കിലും ആയിരിക്കണം. ടാര് കട്ട് ചെയ്യുമ്പോള് അസ്ഫാല്ട്ട് കട്ടര് ഉപയോഗിച്ച് ഒരടി ആഴത്തില് കുഴിക്കണം. അല്ലെങ്കില് കോണ്ട്രാക്ടറുടെ ലൈസന്സ് റദ്ദാക്കുന്നതുള്പ്പെടെയുള്ള നടപടികള് സ്വീകരിക്കും. കോര്പറേഷന് റോഡ്, പിഡബ്ളിയുഡി റോഡ്, പിഡബ്ളിയുഡി എന് എച്ച് ഡിവിഷന് റോഡ് എന്നിവ ടാര് കട്ടു ചെയ്യുന്നതിന് മുമ്പ് യഥാക്രമം കോര്പറേഷന് അസി എക്സിക്യൂട്ടീവ് എഞ്ചിനീയര്, പിഡബ്ളിയുഡി അസി എക്സിക്യൂട്ടീവ് എഞ്ചിനീയര്, പിഡബ്ളിയുഡി എന് എച്ച് ഡിവിഷന് എക്സിക്യൂട്ടീവ് എഞ്ചിനീയര് എന്നിവരെ അറിയിക്കണം. കേരള റോഡ്ഫണ്ട് ബോര്ഡിന്റെ കീഴിലുള്ള റോഡ് പ്രൊജക്ട് ഡയറക്ടറെ അറിയിച്ച് അനുമതി വാങ്ങിയ ശേഷം മാത്രമേ റോഡ് കട്ടിംഗ് നടത്താവൂ. അംഗീകൃതകേരള വാട്ടര് അതോറിറ്റി കോണ്ട്രാക്ടറെക്കൊണ്ടു മാത്രമേ പണി ചെയ്യിക്കാവൂ. റോഡു കട്ടുചെയ്യുമ്പോഴുള്ള അപകടങ്ങള് ഒഴിവാക്കാന് ആവശ്യമായ മുന്കരുതല് സ്വീകരിക്കണമെന്നും ജില്ലാ കളക്ടര് അറിയിച്ചു.
Discussion about this post