തിരുവനന്തപുരം: കേരള കലാമണ്‌ഡലം കല്‌പിത സര്‍വകലാശാലയുടെ കര്‍ണാടകസംഗീതം പഠനക്കളരി ഇടപ്പഴിഞ്ഞി തപസ്യയില്‍ പ്രവര്‍ത്തനമാരംഭിച്ചു. സംസ്ഥാനത്തെ പരമ്പരാഗതകലകളുടെ മൂല്യം കാത്തുസൂക്ഷിക്കാന്‍ ഇത്തരം പഠനക്കളരികള്‍ സഹായിക്കുമെന്ന്‌ ഉദ്‌ഘാടനം നിര്‍വഹിച്ച മുഖ്യമന്ത്രി ഉമ്മന്‍ചാണ്ടി അഭിപ്രായപ്പെട്ടു.
കലാമണ്‌ഡലം സംസ്ഥാനത്ത്‌ ആരംഭിക്കുന്ന അഞ്ച് കലാസ്വാദനപഠനക്കളരികളില്‍ ഒന്നാണ്‌ ജില്ലയിലേത്‌. കലാമണ്‌ഡലം കല്‌പിത സര്‍വകലാശാലയുടെ ഉപകേന്ദ്രങ്ങള്‍ സ്ഥാപിക്കുന്നതിനുള്ള മുന്നോടിയാണ്‌ പഠനക്കളരികളെന്നും സാധ്യതാപഠനം നടത്തിയ ശേഷം ഘട്ടം ഘട്ടമായി ഇവ സര്‍വകലാശാലയുടെ ഉപകേന്ദ്രമായി മാറുമെന്നും ചടങ്ങില്‍ അദ്ധ്യക്ഷത വഹിച്ച സാംസ്‌കാരികമന്ത്രി കെ സി ജോസഫ്‌ അറിയിച്ചു. ആലപ്പുഴ, പത്തനംതിട്ട, കോട്ടയം, കണ്ണൂര്‍ എന്നീ ജില്ലകളിലാണ്‌ മറ്റ്‌ പഠനക്കളരികള്‍. ജില്ലയില്‍ കലാമണ്‌ഡലത്തിന്റെ ഉപകേന്ദ്രം തുടങ്ങാനായി സ്ഥലം ഉള്‍പ്പെടെയുള്ള അടിസ്ഥാനസൗകര്യങ്ങള്‍ നല്‌കാനായി കൂട്ടായ പരിശ്രമം നടത്തുമെന്ന്‌ ആരോഗ്യമന്ത്രി വി എസ്‌ ശിവകുമാര്‍ പറഞ്ഞു. കര്‍ണാടകസംഗീതത്തില്‍ ഒരു വര്‍ഷം നീണ്ട കോഴ്‌സാണ്‌ ഇടപ്പഴിഞ്ഞിയിലെ പഠനക്കളരിയില്‍ ആരംഭിക്കുക. ആഴ്‌ചയില്‍ നാലുദിവസം ഒന്നരമണിക്കുര്‍ വീതമുള്ള ക്‌ളാസുകളാണ്‌ ഉണ്ടാവുക. കലാമണ്‌ഡലം കല്‌പിതസര്‍വകലാശാലയുടെ പഠനക്കളരിയില്‍ പങ്കെടുത്തവര്‍ എന്നു തെളിയിക്കുന്ന സര്‍ട്ടിഫിക്കറ്റാണ്‌ കോഴ്‌സിനുശേഷം പഠിതാക്കള്‍ക്ക്‌ ലഭിക്കുക എന്ന്‌ വൈസ്‌ചാന്‍സലര്‍ പി എന്‍ സുരേഷ്‌ പറഞ്ഞു. മേയര്‍ അഡ്വ കെ ചന്ദ്രിക, കലാമണ്‌ഡലം നിര്‍വാഹകസമിതി അംഗങ്ങള്‍, ജനപ്രതിനിധികള്‍ തുടങ്ങിയവര്‍ പങ്കെടുത്തു.
Discussion about this post