തിരുവനന്തപുരം: വിദ്യാര്ത്ഥിയെ പട്ടിക്കൂട്ടിലടച്ച സംഭവത്തെത്തുടര്ന്ന് പൂട്ടിയ കുടപ്പനക്കുന്ന് ജവഹര് ഇംഗ്ളീഷ് മീഡിയം സ്കൂള് ഈ അധ്യയനവര്ഷം തുറന്നു പ്രവര്ത്തിപ്പിക്കണമെന്ന് ഡിപിഐ-യോട് ശുപാര്ശ ചെയ്യാന് ജില്ലാഭരണകൂടം തീരുമാനിച്ചു. സ്കൂള് പൂട്ടിയതിനെത്തുടര്ന്ന് വിദ്യാര്ത്ഥികളുടെ അധ്യയനം മുടങ്ങാതിരിക്കാനാണ് ഈ തീരുമാനം.
ഈ അധ്യയന വര്ഷം മക്കളെ ജവഹര് സ്കൂളില് തന്നെ തുടര്ന്ന് പഠിപ്പിക്കക്കണമെന്നാണ് ഭൂരിപക്ഷം രക്ഷിതാക്കളുടെയും അഭിപ്രായമെന്ന് കഴിഞ്ഞ ദിവസം ജില്ലാ കളക്ടര് ബിജു പ്രഭാകറിന്റെ അദ്ധ്യക്ഷതയില് ചേര്ന്ന യോഗത്തില് രക്ഷാകര്തൃ പ്രതിനിധികള് അറിയിച്ചിരുന്നു. തുടര്ന്ന് ഇതുസംബന്ധിച്ച് രക്ഷാകര്ത്താക്കളുടെ അഭിപ്രായം ആരാഞ്ഞശേഷമാണ് തീരുമാനം എടുത്തത്. സ്കൂളിലെ 123 കുട്ടികളില് 107 പേരുടെ രക്ഷിതാക്കളും അതേ സ്കൂളില് കുട്ടികളെ തുടര്ന്നു പഠിപ്പിക്കണമെന്നാണ് അഭിപ്രായപ്പെട്ടത്. വിവാദസംഭവത്തെതുടര്ന്ന് നടത്തിയ പരിശോധനയില് സ്കൂളില് അധ്യയനത്തിനുള്ള അടിസ്ഥാനസൗകര്യങ്ങളില്ലെന്ന് വ്യക്തമായതിനെത്തുടര്ന്ന് ഡിപിഐ സ്കൂള് അടച്ചു പൂട്ടാന് ഉത്തരവിട്ടിരുന്നു.കുട്ടികള്ക്ക് അടുത്തുള്ള സര്ക്കാര് സ്കൂളില് പ്രവേശനം നല്കുക, മറ്റ് സിബിഎസ്ഇ സ്കൂളുകളില് പ്രവേശനം നല്കുക, സ്കൂള് ഏറ്റെടുത്തു നടത്തുക എന്നീ വിവിധ സാധ്യതകള് ജില്ലാ ഭരണകൂടം രക്ഷിതാക്കളുമായും പൊതുപ്രവര്ത്തകരുമായും ചര്ച്ച ചെയ്തിരുന്നു. എന്നാല് ഇക്കാര്യത്തില് രക്ഷാകര്ത്താക്കള്ക്കിടയില് ഒരു അഭിപ്രായ ഐക്യത്തിലെത്താന് സാധിച്ചിരുന്നില്ല.
വിവാദമായ സ്കൂളുകളില് നിന്നും പുതിയ സ്കൂളിലേയ്ക്ക് കുട്ടികളെ ഇപ്പോള് മാറ്റുന്നത് വിദ്യാര്ത്ഥികള്ക്ക് മാനസികപ്രയാസത്തിന് ഇടയാക്കുമെന്നാണ് ഭൂരിപക്ഷം രക്ഷാകര്ത്താക്കളും അഭിപ്രായപ്പെട്ടത്.
Discussion about this post