തിരുവനന്തപുരം: ശബരിമലയില് വിവിധ സംസ്ഥാനങ്ങളുടെ സഹകരണത്തോടെ, മണ്ഡലം മകരവിളക്ക് മഹോത്സവക്കാലത്ത്, തീര്ത്ഥാടകര്ക്കുള്ള സൗകര്യങ്ങള് വിപുലമാക്കുമെന്ന് ആഭ്യന്തര മന്ത്രി രമേശ് ചെന്നിത്തല പറഞ്ഞു. ദേവസ്വം മന്ത്രി വി. എസ്. ശിവകുമാറിന്റെ നേതൃത്വത്തില് ഇതിനായുള്ള നടപടികള് സ്വീകരിച്ചിട്ടുണ്ടെന്നും അദ്ദേഹം പറഞ്ഞു.
തിരുവനന്ദപുരത്ത് ദക്ഷിണേന്ത്യന് സംസ്ഥാനങ്ങളിലെ ദേവസ്വം ഉദ്യോഗസ്ഥരുടെ യോഗത്തില് അധ്യക്ഷത വഹിച്ച് സംസാരിക്കുകയായിരുന്നു അദ്ദേഹം. തമിഴ്നാട്, കര്ണാടക, ആന്ധ്രാ തെലുങ്കാന സംസ്ഥാന തലസ്ഥാനങ്ങളില് ശബരിമല കണ്ട്രോള് റൂമുകള് തുറക്കും. എറണാകുളം, കോട്ടയം, ചെങ്ങന്നൂര് എന്നിവിടങ്ങളില് ആരംഭിക്കുന്ന കണ്ട്രോള് റൂമുകളില് തീര്ത്ഥാടക സൗകര്യാര്ത്ഥം ദക്ഷിണേന്ത്യന് സംസ്ഥാനങ്ങളുടെ പ്രതിനിധികളുടെ സേവനം ലഭ്യമാക്കും. പമ്പയിലും സന്നിധാനത്തും ഡിസാസ്റ്റര് മാനേജ്മെന്റ് സംവിധാനം ശക്തമാക്കും.
കേരളത്തില് ഭക്ഷണം, കുടിവെള്ളം അവശ്യവസ്തുക്കള് മുതലായവയ്ക്ക് തീര്ത്ഥാടകരില് നിന്നും കൂടുതല് വില ഈടാക്കുന്നതായി സംസ്ഥാന പ്രതിനിധികള് യോഗത്തില് അറിയിച്ചു. ഇത്തരത്തില് ഭക്തജനങ്ങളെ ചൂഷ്ണം ചെയ്യുന്നവര്ക്കെതിരെ കര്ശന നടപടി സ്വീകരിക്കുമെന്ന് ആഭ്യന്തര മന്ത്രി മുന്നറിയിപ്പ് നല്കി. നിലയ്ക്കലില് ദക്ഷിണേന്ത്യന് സംസ്ഥാനങ്ങളുടെ മന്ദിരങ്ങള് നിര്മ്മിക്കുന്നതുമായി ബന്ധപ്പെട്ട് നിലനില്ക്കുന്ന ഹൈക്കോടതി സ്റ്റേ ഒഴിവാക്കി കിട്ടാന് തിരുവിതാംകൂര് ദേവസ്വം ബോര്ഡ് നടപടി സ്വീകരിക്കുമെന്നും യോഗത്തില് അറിയിച്ചു. ശബരിമല മാസ്റ്റര്പ്ലാന് പദ്ധതികളുടെ പുരോഗതിയെക്കുറിച്ച് ഉന്നതാധികാര സമിതി ചെയര്മാന് കെ. ജയകുമാര് സോദാഹരണപ്രഭാഷണം നടത്തി.
ദേവസ്വം ബോര്ഡ് പ്രസിഡന്റ് എം.പി. ഗോവിന്ദന് നായര്, മെമ്പര്മാരായ സുബാഷ് വാസു, പി.കെ. കുമാരന്, ദേവസ്വം വകുപ്പ് സെക്രട്ടറി കെ.ആര്. ജ്യോതിലാല്, ബോര്ഡ് കമ്മീഷണര് പി. വേണുഗോപാല്, ദക്ഷിണമേഘലാ അഡീഷണല് ഡി.ജി.പി കെ. പത്മകുമാര്, പത്തനംതിട്ട കളക്ടര് എസ്.ഹരികിഷോര്, ദക്ഷിണേന്ത്യന് സംസ്ഥാനപ്രതിനിധികളായ പി.ഡി.ധനപാല് (തമിഴ്നാട്), വൈ.വി.അനുരാധ (ആന്ധ്രാപ്രദേശ്), എം.എം.ഡി.കൃഷ്ണവേണി (തെലുങ്കാന), പല്ലവി, കെ. കെ. പ്രദീപ്, വി. വി. പ്രഭു (കര്ണാടക), തിരുവിതാംകൂര് ദേവസ്വം ബോര്ഡ് ചീഫ് എന്ജിനീയര്മാരായ പി.എസ്. ജോളി ഉല്ലാസ്, ജി. മുരളീകൃഷ്ണന്, എക്സിക്യൂട്ടീവ് എന്ജിനീയര് വി. ശങ്കരന് പോറ്റി, ശബരിമല ഹൈപ്പവര് കമ്മിറ്റിയുടെ ആര്ക്കിടെക്ട് മഹേഷ് തുടങ്ങിയവര് പങ്കെടുത്തു.
Discussion about this post