ന്യൂഡല്‍ഹി: മുല്ലപ്പെരിയാര്‍ കേസില്‍ കേരളം നല്‍കിയ പുനപരിശോധനാ ഹര്‍ജി സുപ്രീം കോടതി തള്ളി. ചീഫ് ജസ്റ്റീസ് എച്ച്.എല്‍. ദത്തു അധ്യക്ഷനായ ബഞ്ചാണ് ഹര്‍ജി തള്ളിയത്. മുല്ലപ്പെരിയാര്‍ അണക്കെട്ടിലെ ജലനിരപ്പ് 142 അടിയാക്കി ഉയര്‍ത്താന്‍ അനുവദിച്ച ഭരണഘടനാ ബഞ്ചിന്റെ വിധി പുനപരിശോധിക്കണമെന്ന് ആവശ്യപ്പെട്ടായിരുന്നു കേരളത്തിന്റെ ഹര്‍ജി നല്‍കിയത്.
1886 ല്‍ ബ്രിട്ടീഷ് സര്‍ക്കാരുമായി തിരുവിതാംകൂര്‍ ഉണ്ടാക്കിയ കരാര്‍ നിയമപരമായി നിലനില്‍ക്കുന്നില്ലെന്നും ഡാം സുരക്ഷിതമാണെന്ന് കണ്‌ടെത്തിയതില്‍ കോടതിക്ക് വീഴ്ച സംഭവിച്ചിട്ടുണ്‌ടെന്നുമാണ് കേരളം ഹര്‍ജിയിലൂടെ വാദിച്ചത്. വിഷയത്തിന്റെ ഗൗരവം കണക്കിലെടുത്ത് തുറന്ന കോടതിയില്‍ ഹര്‍ജി പരിഗണിക്കണമെന്നാണ് കേരളം ആവശ്യപ്പെട്ടിരുന്നതെങ്കിലും ചൊവ്വാഴ്ച ചീഫ് ജസ്റ്റിസ് എച്ച്.എല്‍. ദത്തുവിന്റെ അടച്ചിട്ട ചേംബറിലാണ് ഹര്‍ജി പരിഗണിച്ചത്.
ഇക്കഴിഞ്ഞ മേയ് ഏഴിനായിരുന്നു അന്നത്തെ ചീഫ് ജസ്റ്റിസ് ആര്‍.എം. ലോധ അധ്യക്ഷനായ ഭരണഘടനാ ബഞ്ച് മുല്ലപ്പെരിയാറിലെ ജലനിരപ്പ് 142 അടിയാക്കാന്‍ തമിഴ്‌നാടിനെ അനുവദിച്ചു കൊണ്ട് ഉത്തരവിട്ടത്. ഇതേതുടര്‍ന്ന് ഇക്കഴിഞ്ഞ ദിവസം അണക്കെട്ടിലെ ജലനിരപ്പ് തമിഴ്‌നാട് 142 അടിയാക്കിക്കൊണ്ടുതന്നെ 10 മണിക്കൂറോളം ഇത് നില നിര്‍ത്തുകയും ചെയ്തിരുന്നു.
