തിരുവനന്തപുരം: ദേശീയ ഗെയിംസിനോടനുബന്ധിച്ച് തിരുവനന്തപുരത്ത് സെക്രട്ടേറിയറ്റ് നടയില്‍ നിന്നും 20-ാം തീയതി രാവിലെ 10.30 ന് ആരംഭിക്കുന്ന റണ്‍ കേരള റണ്‍ ഗവര്‍ണര്‍ ജസ്റ്റിസ് പി. സദാശിവം ഫ്‌ളാഗ് ഓഫ് ചെയ്യും. സെക്രട്ടേറിയറ്റിന്റെ തെക്കേ ഗേറ്റില്‍ നിന്നും ആരംഭിച്ച് വടക്കേ ഗേറ്റിലൂടെ കന്റോണ്‍മെന്റ് ഗേറ്റ് വഴി സെന്‍ട്രല്‍ സ്റ്റേഡിയത്തില്‍ അവസാനിക്കുന്ന റണ്‍ കേരള റണ്ണിന് സച്ചിന്‍ തെണ്ടുല്‍ക്കര്‍ നേതൃത്വം നല്‍കും.
മുഖ്യമന്ത്രി ഉമ്മന്‍ ചാണ്ടി, വിവിധ സമുദായ നേതാക്കള്‍, സഭാധ്യക്ഷന്‍മാര്‍, സിനിമാ, കായിക താരങ്ങള്‍ തുടങ്ങിയവര്‍ പങ്കെടുക്കും. ഇതിനുശേഷം സെന്‍ട്രല്‍ സ്റ്റേഡിയത്തില്‍ പൊതുയോഗവും സംഘടിപ്പിച്ചിട്ടുണ്ട്. പ്രതിപക്ഷനേതാവ് വി.എസ്. അച്യുതാനന്ദന്‍ ഡല്‍ഹിയില്‍ നിന്ന് മടങ്ങിയെത്തിയാലുടന്‍ അദ്ദേഹം റണ്‍ കേരള റണ്ണിന് പങ്കെടുക്കുന്ന കാര്യം നേരിട്ട് സംസാരിക്കുമെന്ന് പരിപാടികള്‍ വിശദീകരിച്ചുകൊണ്ട് നടത്തിയ വാര്‍ത്താ സമ്മേളനത്തില്‍ കായിക മന്ത്രി തിരുവഞ്ചൂര്‍ രാധാകൃഷ്ണന്‍ പറഞ്ഞു.
ജനുവരി 14 വൈകുന്നേരം മൂന്ന് മണിക്ക് കുമാരപുരത്ത് ദേശീയ ഗെയിംസിനായുള്ള ടെന്നീസ് കോര്‍ട്ട് മുഖ്യമന്ത്രി ഉദ്ഘാടനം ചെയ്യും. പ്രശസ്ത ടെന്നീസ് താരം രാമനാഥന്‍ കൃഷ്ണന്‍ ചടങ്ങില്‍ സംബന്ധിക്കും. മറ്റ് വേദികളുടെ ഉദ്ഘാടനവും മുഖ്യമന്ത്രി നിര്‍വഹിക്കും. 15 ന് രാവിലെ 11 മണിക്ക് കണ്ണൂര്‍ മുണ്ടയാട് ഇന്‍ഡോര്‍ സ്റ്റേഡിയം, 16 ന് രാവിലെ 9.30 ന് എറണാകുളം സിയാലിലെ ലോണ്‍ ബൗള്‍സ് കോര്‍ട്ട്, 22 ന് രാവിലെ 9.30 ന് തൃശൂര്‍ വി.കെ.എന്‍. മേനോന്‍ ഇന്‍ഡോര്‍ സ്റ്റേഡിയം, 11 മണിക്ക് തൃശൂര്‍ കോര്‍പ്പറേഷന്‍ സ്റ്റേഡിയം തുടര്‍ന്ന് തൃശൂര്‍ പോലീസ് അക്കാദമിയിലെ ട്രാപ് ആന്റ് സ്‌കീറ്റ് സ്റ്റേഡിയം, 23 ന് വൈകുന്നേരം നാല് മണിക്ക് തിരുവനന്തപുരം കെ.ഡബ്ല്യു.എ സ്വിമ്മിങ് പൂള്‍, അഞ്ച് മണിക്ക് പ്രാക്ടീസിനായുള്ള റ്റി.റ്റി.സി യിലെ ടെന്നീസ് കോര്‍ട്ട്, ആറ് മണിക്ക് വട്ടിയൂര്‍ക്കാവിലെ ഷൂട്ടിങ് റേഞ്ച്, 24 ന് വൈകുന്നേരം അഞ്ച് മണിക്ക് കോഴിക്കോട് കോര്‍പ്പറേഷന്‍ സ്റ്റേഡിയം 26 ന് വൈകുന്നേരം അഞ്ച് മണിക്ക് കാര്യവട്ടം ഗ്രീന്‍ഫീല്‍ഡ് സ്റ്റേഡിയം, 27 ന് വൈകിട്ട് അഞ്ച് മണിക്ക് കൊല്ലം ഹോക്കി സ്റ്റേഡിയം എന്നിവയുടെ ഉദ്ഘാടനവും 28 ന് വൈകുന്നേരം അഞ്ച് മണിക്ക് മേനംകുളം ഗെയിംസ് വില്ലേജിന്റെ ഗൃഹപ്രവേശവും മുഖ്യമന്ത്രി ഉമ്മന്‍ ചാണ്ടി നിര്‍വഹിക്കും.
Discussion about this post