തിരുവനന്തപുരം: വിദ്യാഭ്യാസം, മാനവവിഭവശേഷി, കൃഷി, സാമ്പത്തിക വളര്‍ച്ച എന്നീ മേഖലകളില്‍ ഇന്ത്യയില്‍ മുന്നില്‍ നില്‍ക്കുന്ന സംസ്ഥാനമാണ് കേരളമെന്ന് ഗവര്‍ണര്‍ ജസ്റ്റീസ് പി. സദാശിവം അഭിപ്രായപ്പെട്ടു. അറുപത്തിയാറാമത് റിപ്പബ്ലിക് ദിനത്തില്‍ നല്‍കിയ സന്ദേശത്തിലാണ് ഗവര്‍ണര്‍ കേരളത്തിന്റെ നേട്ടങ്ങള്‍ എടുത്തു പറഞ്ഞത്.
കേരളത്തെ അടുത്തിടെ ആശങ്കയിലാഴ്ത്തിയ പക്ഷിപ്പനിപ്പേടിയില്‍ നിന്നും ജനങ്ങളെ മോചിപ്പിച്ചത് സര്‍ക്കാരിന്റെ സമയോചിതമായ ഇടപെടലാണ്. വിവിധ വകുപ്പുകളുടെ കാര്യക്ഷമമായ ഏകോപനത്തിലൂടെ ഒരു മാസത്തിനുള്ളില്‍ത്തന്നെ രോഗത്തെ നിയന്ത്രണാധീനമാക്കാനും കര്‍ഷകര്‍ക്ക് ഉചിതമായ നഷ്ടപരിഹാരം നല്‍കാനും കഴിഞ്ഞു. കേരളാ പോലീസിന്റെയും മോട്ടോര്‍ വാഹന വകുപ്പിന്റെയും സംയുക്തമായ സുഖയാത്ര റോഡപകടങ്ങള്‍ കുറയ്ക്കുവാന്‍ ഉതകുന്ന ഫലപ്രദമായ ആശയമാണ്. മുപ്പത്തിയഞ്ചാമത് ദേശീയ ഗയിംസിന് കേരളം സജ്ജമായിക്കഴിഞ്ഞു. ഗെയിംസ് കേരളത്തില്‍ നടക്കുന്നുവെന്നത് നമുക്ക് അഭിമാനവും പ്രതീക്ഷയും നല്‍കുന്നു. കേരളത്തിന്റെ ചുണക്കുട്ടികള്‍ ഗെയിംസില്‍ വിജയക്കൊടി പാറിക്കുമെന്നും ഗവര്‍ണര്‍ ശുഭാപ്തി വിശ്വാസം പ്രകടിപ്പിച്ചു. കമ്പ്യൂട്ടര്‍വത്ക്കരണത്തെ പരമാവധി പ്രയോജനപ്പെടുത്തുന്നതില്‍ കേരളം മുന്നിലാണ്. ഐ.ടി. മിഷന്റെ പ്രവര്‍ത്തനത്തെ ഗവര്‍ണര്‍ പ്രത്യേകം ശ്ലാഘിച്ചു. മിക്കവാറും എല്ലാ വകുപ്പുകളിലും ഇ-ഗവേണന്‍സ് നടപ്പിലായിട്ടുണ്ട്. ഇതിന്റെ ഫലങ്ങള്‍ പ്രോത്സാഹജനകമാണ്. വികസനത്തിനാവശ്യമായ അടിസ്ഥാന സൗകര്യങ്ങള്‍ ഒരുക്കുന്നതിലേക്ക് ആവശ്യമായ ഇരുപത്തയ്യായിരം കോടി രൂപയുടെ വിഭവ സമാഹരണ പദ്ധതിക്ക് സര്‍ക്കാര്‍ അനുമതി നല്‍കിക്കഴിഞ്ഞു.
പ്രവാസി മലയാളികളിലൂടെ സംസ്ഥാനത്തിന് മികച്ച നേട്ടമുണ്ടാക്കാന്‍ കഴിഞ്ഞിട്ടുണ്ട്. വിശുദ്ധ പദവിയിലേക്കുയര്‍ത്തപ്പെട്ട ചാവറ കുര്യക്കോസ് അച്ചന്റെയും സിസ്റ്റര്‍ ഏവുപ്രാസ്യമ്മയുടെയും ആഘോഷച്ചടങ്ങുകള്‍ കേരളം ഒരേ മനസോടെയാണ് ആഘോഷിച്ചത്. കേരളീയ ആത്മീയകേന്ദ്രങ്ങള്‍ മതസൗഹാര്‍ദ്ദത്തിന്റെ മകുടോദാഹരണങ്ങളാണെന്നും ഗവര്‍ണര്‍ അഭിപ്രായപ്പെട്ടു
Discussion about this post