തിരുവനന്തപുരം: വിദേശരാജ്യങ്ങളില് നിന്ന് ഉന്നതവിദ്യാഭ്യാസത്തിന് കേരളത്തിലെത്തുന്ന വിദ്യാര്ത്ഥികളുടെ പ്രവേശനം, ഫീസ് എന്നിവയില് വ്യക്തമായ മാനദണ്ഡങ്ങള് തയ്യാറാക്കുന്നത് പരിഗണിക്കുമെന്ന് മുഖ്യമന്ത്രി ഉമ്മന്ചാണ്ടി പറഞ്ഞു. സംസ്ഥാന ഉന്നത വിദ്യാഭ്യാസ കൗണ്സില് ഇന്ത്യന് കൗണ്സില് ഫോര് കള്ച്ചറല് റിലേഷന്സുമായി ചേര്ന്ന് തിരുവനന്തപുരം ശാസ്ത്ര സാങ്കേതിക മ്യൂസിയം ഹാളില് സംഘടിപ്പിച്ച രാജ്യാന്തര വിദ്യാര്ത്ഥി സംഗമത്തില് സംസാരിക്കുകയായിരുന്നു അദ്ദേഹം.
സംസ്ഥാനത്തെ ഉന്നത വിദ്യാഭ്യാസ സ്ഥാപനങ്ങളില് വിദേശ വിദ്യാര്ത്ഥികള്ക്കായി പ്രത്യേക വിഭാഗം ആരംഭിക്കുന്ന കാര്യം പരിശോധിക്കുമെന്നും വിദ്യാര്ത്ഥികളുടെ ചോദ്യത്തിന് മുഖ്യമന്ത്രി മറുപടി നല്കി. ഗവേഷണപ്രബന്ധങ്ങളുടെ മൂല്യനിര്ണയത്തില് കാലതാമസമുണ്ടാകുന്നുവെന്ന് വിദേശവിദ്യാര്ത്ഥികള് ചിലര് മുഖ്യമന്ത്രിയോട് പരാതിപ്പെട്ടു. വിസ കാലാവധി കഴിയുമ്പോള് സ്വന്തം രാജ്യത്തേക്ക് മടങ്ങിപ്പോകുന്ന വിദ്യാര്ത്ഥികള്ക്ക് പിന്നീട് മുഖാമുഖത്തിനായി മടങ്ങിവരുമ്പോള് പ്രശ്നങ്ങള് ഉണ്ടാകുന്നുവെന്നും വിദ്യാര്ത്ഥികള് പറഞ്ഞു. പ്രതിവര്ഷമുള്ള ഫീസ് വര്ദ്ധനയുടെ തോത് മുന്കൂട്ടി നിജപ്പെടുത്തണമെന്നും വിദേശ വിദ്യാര്ത്ഥികള് ആവശ്യപ്പെട്ടു. പ്രധാന കോഴ്സിലേക്ക് കടക്കുംമുമ്പ് കേരളത്തെപ്പറ്റി അറിയാന് ഹ്രസ്വകാല കോഴ്സുകള് വേണം. മലയാളഭാഷ പഠിക്കാനുള്ള സൗകര്യം ലഭ്യമാക്കണമെന്നും വിദ്യാര്ത്ഥികള് ആവശ്യമുന്നയിച്ചു. വിദ്യാര്ത്ഥി സംഗമത്തില് ഉന്നയിക്കപ്പെട്ട പ്രശ്നങ്ങള് പരിഹരിക്കാന് പ്രത്യേക ശ്രദ്ധപുലര്ത്തുമെന്ന് മുഖ്യമന്ത്രി ഉറപ്പുനല്കി. ഉന്നത വിദ്യാഭ്യാസ മേഖലയില് കേരളത്തെ രാജ്യാന്തര ലക്ഷ്യസ്ഥാനമാക്കുകയാണ് സര്ക്കാരിന്റെ ലക്ഷ്യമെന്ന് നേരത്തേ ചടങ്ങിനെ അഭിസംബോധന ചെയ്തുകൊണ്ട് മുഖ്യമന്ത്രി അഭിപ്രായപ്പെട്ടു. കേരളത്തിന്റെ മികവാര്ന്ന വിദ്യാഭ്യാസസംവിധാനവും കാലാവസ്ഥയും ലോകത്തിന്റെ ഏതു ഭാഗത്തെ വിദ്യാര്ത്ഥികളെയും ആകര്ഷിക്കാന് പോന്നതാണെന്നും മുഖ്യമന്ത്രി പറഞ്ഞു.
ഇറാന്, അഫ്ഗാനിസ്ഥാന്, റഷ്യ, കൊറിയ, തുടങ്ങി വിവിധ രാജ്യങ്ങളില്നിന്ന് മുന്നൂറോളം വിദ്യാര്ത്ഥികളാണ് കേരളത്തിലെ ഉന്നതവിദ്യാഭ്യാസ സ്ഥാപനങ്ങളില് വിദ്യാഭ്യാസമന്ത്രി പി.കെ.അബ്ദുറബ്ബ്, ഉന്നത വിദ്യാഭ്യാസ കൗണ്സില് വൈസ് ചെയര്മാന് ടി.പി.ശ്രീനിവാസന്, ഐ.സി.സി.ആര്.പ്രോഗ്രാം ഡയറക്ടര് ഡോ.ലെസ്ലി ജോസഫ്, കൗണ്സില് മെംബര് സെക്രട്ടറി പി.അന്വര് തുടങ്ങിയവര് സംബന്ധിച്ചു.
Discussion about this post