തിരുവനന്തപുരം: നിയമസഭയില് ബജറ്റ് ദിവസം നടന്ന അക്രമത്തിന്റെ വീഡിയോ ദൃശ്യങ്ങള് അടങ്ങിയ സിഡി നിയമസഭാ സെക്രട്ടേറിയറ്റ് പോലീസിന്റെ പ്രത്യേക അന്വേഷണ സംഘത്തിനു കൈമാറി. പോലീസിനു ലഭിച്ച സിഡി ശാസ്ത്രീയ പരിശോധനകള്ക്കായി ഫോറന്സിക് സൈബര് സെല്ലിലേക്ക് അയച്ചു. സിഡിയിലെ വിവരങ്ങള് എഡിറ്റ് ചെയ്തതല്ലെന്നു ശാസ്ത്രീയമായി ഉറപ്പാക്കാനാണു സിഡി സൈബര് പരിശോധനയ്ക്ക് അയച്ചത്. പരിശോധനയ്ക്കു ശേഷം ഈ സിഡി വരും ദിവസങ്ങളില് തിരികെ ലഭിക്കും. സിഡി തിരികെ ലഭിച്ച ശേഷം ഇതിലെ വിശദാംശം പോലീസ് ശേഖരിക്കും. സിഡിയിലെ ദൃശ്യങ്ങളുടെ അടിസ്ഥാനത്തിലാകും അക്രമം കാട്ടുകയും പൊതുമുതല് നശിപ്പിക്കുകയുംചെയ്ത ഏതൊക്കെ എംഎല്എമാര്ക്കെതിരേ കേസെടുക്കണമെന്നു തീരുമാനിക്കുന്നത്. പൊതുമുതല് നശിപ്പിച്ചതിന് എംഎല്എമാരെ പ്രതിയാക്കുന്ന നടപടികളിലേക്ക് അടുത്ത ആഴ്ചയോടെ കടക്കും. നിലവില് ആരെയും പ്രതിയാക്കാതെയാണു കേസെടുത്തിട്ടുള്ളത്.
ഇതിനിടെ, കന്റോണ്മെന്റ് എസിപി വി. സുരേഷ്കുമാറിന്റെ നേതൃത്വത്തിലുള്ള പ്രത്യേക അന്വേഷണസംഘം നിയമസഭാ ജീവനക്കാരില്നിന്നുള്ള മൊഴിയെടുപ്പ് തുടര്ന്നു. രണ്ടു ദിവസമായി നിയമസഭാ ജീവനക്കാരുടെ മൊഴി രേഖപ്പെടുത്തി വരികയാണ്. മുന് ദിവസങ്ങളില് നിയമസഭയ്ക്കുള്ളില് പോലീസ് തെളിവെടുപ്പും നടത്തി. സ്പീക്കറുടെ ഡയസും മൈക്കും കംപ്യൂട്ടറും ഉള്പ്പെടെ അഞ്ചു ലക്ഷം രൂപയുടെ നഷ്ടമുണ്ടാക്കിയതായാണു പോലീസിന്റെ കണക്ക്.
സ്പീക്കറുടെ ഡയസില് അക്രമം കാട്ടിയ അഞ്ചു എംഎല്എമാരെ കഴിഞ്ഞ തിങ്കളാഴ്ച സ്പീക്കര് എന്. ശക്തന് സസ്പെന്ഡ് ചെയ്തിരുന്നു. വി. ശിവന്കുട്ടി, ഇ.പി. ജയരാജന്, കെ.ടി. ജലീല്, കെ. അജിത്ത്, കുഞ്ഞഹമ്മദ് എന്നിവരെയാണ് ഈ നിയമസഭാ സമ്മേളനം തീരുന്നതു വരെ സസ്പെന്ഡ് ചെയ്തത്.
Discussion about this post