തിരുവനന്തപുരം: കേരളത്തില് എയിംസ് (ആള് ഇന്ത്യ ഇന്സ്റ്റിറ്റ്യൂട്ട് ഓഫ് മെഡിക്കല് സയന്സസ്) സ്ഥാപിക്കാന് ഉടന് നടപടി സ്വീകരിക്കുമെന്ന് കേന്ദ്ര ആരോഗ്യ കുടുംബക്ഷേമ മന്ത്രി ജഗദ് പ്രകാശ് നദ്ദ അറിയിച്ചു. ഇതിനായി സംസ്ഥാന സര്ക്കാര് നിര്ദ്ദേശിച്ച നാല് സ്ഥലങ്ങള് പരിശോധിക്കാന് കേന്ദ്ര സംഘത്തെ അയക്കുമെന്നും അദ്ദേഹം പറഞ്ഞു. തിരുവനന്തപുരം മെഡിക്കല് കോളേജില് ഏഴ് നിലകളിലായി നിര്മ്മിക്കുന്ന ലേഡീസ് ഹോസ്റ്റല് മന്ദിരം, ഡെന്റല് കോളേജിലെ അഡിഷണല് ബ്ലോക്ക്, തീയറ്റര് കോംപ്ലക്സ്, ഐ.പി. സംവിധാനം എന്നിവയുടെ ശിലാ അനാഛാദനം നിര്വ്വഹിച്ച് സംസാരിക്കുകയായിരുന്നു അദ്ദേഹം.
മരുന്നുവില കുറയ്ക്കാന്, കേന്ദ്ര കെമിക്കല്സ് ആന്റ് ഫെര്ട്ടിലൈസേഴ്സ് വകുപ്പ് മന്ത്രി അനന്തകുമാറുമായി ആലോചിച്ച് നടപടി സ്വീകരിക്കുമെന്നും ജഗദ് പ്രകാശ് നദ്ദ അറിയിച്ചു. മെഡിക്കല് വിദ്യാഭ്യാസ രംഗത്ത് കാലോചിതമായ പുരോഗതി കൈവരിക്കേണ്ടത് വളരെ അത്യാവശ്യമാണ്. ജനസംഖ്യാനുപാതികമായി ഡോക്ടര്മാരുടെ സേവനം ലഭ്യമാക്കണമെങ്കില് കൂടുതല് മെഡിക്കല് കോളേജുകള് ആരംഭിക്കണം. കേരളം ഇക്കാര്യത്തില് കൈക്കൊണ്ട സമീപനത്തെ നദ്ദ പ്രശംസിച്ചു. ആര്.സി.സി യിലെ സൗകര്യങ്ങള് വര്ധിപ്പിക്കുന്നതിന് കേന്ദ്ര സര്ക്കാരിന്റെ എല്ലാവിധ സഹായവുമുണ്ടാകുമെന്നും അദ്ദേഹം പറഞ്ഞു.
തിരുവനന്തപുരം, കൊല്ലം, പത്തനംതിട്ട ജില്ലകളില് ഈവര്ഷം പുതിയ ഗവ. മെഡിക്കല് കോളേജുകള് ആരംഭിക്കുമെന്ന് ചടങ്ങില് അധ്യക്ഷത വഹിച്ച ആരോഗ്യമന്ത്രി വി.എസ്. ശിവകുമാര് അറിയിച്ചു. അതോടെ, പതിനൊന്ന് ജില്ലകളിലും സര്ക്കാര് മെഡിക്കല് കോളേജുകള് യാഥാര്ത്ഥ്യമാകും. 2017 ആകുമ്പോഴേക്കും 14 ജില്ലകളിലും മെഡിക്കല് കോളേജുകള് ആരംഭിക്കുകയാണ് ലക്ഷ്യം. പുതിയ മെഡിക്കല് കോളേജുകള്ക്കായി 1500 കോടി രൂപയുടെയും നിലവിലുള്ളവയുടെ അടിസ്ഥാന സൗകര്യവികസനത്തിനായി 470 കോടി രൂപയുടെയും പദ്ധതികളാണ് നടപ്പിലാക്കിവരുന്നത്. കഴിഞ്ഞ മൂന്ന് വര്ഷത്തിനകം നാലായിരത്തി അഞ്ഞൂറോളം തസ്തികകള് സൃഷ്ടിച്ച് നിയമനം നടത്തിക്കൊണ്ട് ആരോഗ്യമേഖലയുടെ സേവന ഗുണമേന്മ വര്ധിപ്പിക്കാന് സാധിച്ചതായി വി.എസ്. ശിവകുമാര് പറഞ്ഞു. ഇലക്ട്രോണിക് ഡീമോഗ്രാഫിക് ഡാറ്റാബേസ് ആന്റ് ഹോസ്പിറ്റല് ഓട്ടോമേഷന് സിസ്റ്റം വികസിപ്പിച്ചെടുക്കുന്ന രാജ്യത്തെ ആദ്യത്തെ സംസ്ഥാനമാണ് കേരളമെന്ന് മന്ത്രി ചൂണ്ടിക്കാട്ടി. ഈ സംവിധാനം താമസിയാതെ സംസ്ഥാനത്ത് നടപ്പാക്കുമെന്നും അദ്ദേഹം അറിയിച്ചു.
Discussion about this post