തിരുവനന്തപുരം: ഉയരം കൂടിയ കെട്ടിടങ്ങള്ക്ക് സുരക്ഷ ഉറപ്പാക്കാനാവുംവിധം അഗ്നിശമനസേനയുടെ സംവിധാനങ്ങള് മെച്ചപ്പെടുത്താന് നടപടി സ്വീകരിക്കും. മുഖ്യമന്ത്രി ഉമ്മന്ചാണ്ടിയുടെ അദ്ധ്യക്ഷതയില് നിയമസഭയിലെ ചേംബറില് ചേര്ന്ന യോഗത്തിലാണ് തീരുമാനം.
അഗ്നിശമന സേനയ്ക്ക് ബഹുനില മന്ദിരങ്ങളില് സുരക്ഷ ഉറപ്പാക്കാന് ആവശ്യമായ ഉപകരണങ്ങളോ സംവിധാനങ്ങളോ നിലവിലില്ല. സ്കൈലിഫ്റ്റ്, ഫയര് പ്രോക്സിമിറ്റി സ്യൂട്ടുകള്, ഹൈഡ്രോളിക് യന്ത്രങ്ങള് തുടങ്ങിയവയും അടിയന്തരമായി ആവശ്യമുണ്ട്. എന്നാല് ഫണ്ട് അപര്യാപ്തമായതിനാല് ഇവയൊന്നും വാങ്ങാന് സാധിക്കുന്നില്ല. അന്പത് മീറ്ററിനു മുകളിലേക്ക് പോകാന് ശേഷിയുള്ള ഫയര്ലിഫ്റ്റ്, ഏരിയല് പ്ലാറ്റ്ഫോം എന്നിവയും അത്യാവശ്യമാണ്. 125 കോടി രൂപയെങ്കിലുമുണ്ടെങ്കില് മാത്രമേ അഗ്നിശമനസേനയുടെ അടിസ്ഥാന സൗകര്യങ്ങള് വര്ദ്ധിപ്പിക്കാന് കഴിയൂ എന്ന് യോഗം അഭിപ്രായപ്പെട്ടു. അതേസമയം ഉപകരണങ്ങള് വാങ്ങുന്നതിനുള്ള നടപടികള് വേഗത്തിലാക്കാന് മുഖ്യമന്ത്രി നിര്ദ്ദേശിച്ചു.
അഗ്നിശമനസേനയ്ക്ക് അത്യന്താധുനിക സംവിധാനമുള്ള രണ്ട് ഫയര് എഞ്ചിനുകള് റവന്യൂ വകുപ്പ് നല്കുമെന്ന് യോഗത്തില് റവന്യൂ മന്ത്രി അടൂര് പ്രകാശ് പറഞ്ഞു. കെട്ടിട നിര്മ്മാണ മേഖലയില് സ്തംഭനാവസ്ഥയുണ്ടാക്കുന്ന തരത്തില് നിര്മ്മാണപ്രവര്ത്തനങ്ങള്ക്ക് എന്.ഒ.സി. നല്കാന് അഗ്നിശമനസേന വിമുഖത കാട്ടുന്നുവെന്ന് ആക്ഷേപമുണ്ട്. കെട്ടിടനിര്മ്മാണത്തിന് തടസ്സം സൃഷ്ടിക്കരുതെന്ന് മുഖ്യമന്ത്രി നിര്ദ്ദേശിച്ചു.
ആഭ്യന്തരവകുപ്പ് മന്ത്രി രമേശ് ചെന്നിത്തല, അഡീഷണല് ചീഫ് സെക്രട്ടറി നളിനി നെറ്റോ ഉന്നതോദ്യോഗസ്ഥര് തുടങ്ങിയവര് സംബന്ധിച്ചു.
Discussion about this post