തിരുവനന്തപുരം: തിരുവല്ലം പരശുരാമസ്വാമി ക്ഷേത്രത്തില് കര്ക്കിടകവാവിനോടനുബന്ധിച്ച് ബലിതര്പ്പണത്തിനെത്തുന്നവര്ക്ക് ആവശ്യമായ സൗകര്യങ്ങളേര്പ്പെടുത്തുമെന്ന് ചീഫ് സെക്രട്ടറി ജിജി തോംസണ് പറഞ്ഞു. കര്ക്കിടകവാവിനുമുന്നോടിയായി ബലിതര്പ്പണത്തിനുള്ള ഒരുക്കങ്ങള് വിലയിരുത്തിയശേഷം സംസാരിക്കുകയായിരുന്നു അദ്ദേഹം.
ഏക പരശുരാമക്ഷേത്രമെന്ന നിലയില് ഏറെ പ്രാധാന്യമുള്ള തീര്ഥാടനകേന്ദ്രമാണിത്. ആയിരക്കണക്കിന് ആള്ക്കാര് ബലിതര്പ്പണചടങ്ങിനെത്തുന്നതിനാല് തിക്കുംതിരക്കുമുണ്ടാകാന് സാധ്യതയുണ്ടെന്ന റിപ്പോര്ട്ടിനെത്തുടര്ന്നാണ് സൗകര്യങ്ങള് വിലയിരുത്താനെത്തിയത്. ഇത്തവണത്തെ കര്ക്കിടകവാവിനുമുമ്പ് ചെയ്യാനാവുന്ന സൗകര്യങ്ങള് ഒരുക്കും. ഇത്രയധികം വിശ്വാസികള് വരുന്ന സ്ഥലമായതിനാല് സംരക്ഷിക്കാനുള്ള ബാധ്യതയുണ്ട്. ഇടുങ്ങിയ സ്ഥലമായതിനാല് സമീപത്ത് നദിക്കരയിലുള്ള ദ്വീപ് പോലുള്ള പ്രദേശം കൂടി ഏറ്റെടുക്കുന്നതിന്റെ സാധ്യത പരിശോധിക്കും. ഇവിടം ലഭ്യമായാല് ചടങ്ങുകള്ക്കും പാര്ക്കിംഗിനും മറ്റും കൂടുതല് സൗകര്യമാകും. മുമ്പ് ദേവസ്വം ബോര്ഡ് ഏറ്റെടുക്കാന് ശ്രമിച്ചിട്ട് നടക്കാതെ പോയ സ്ഥലമാണ്. പുതിയ ഭൂമി ഏറ്റെടുക്കല് നിയമങ്ങള്ക്കനുസരിച്ച് ന്യായമായ വിലനല്കി ഏറ്റെടുക്കാനാവുമോ എന്ന് പരിശോധിക്കും. ചെറിയപാലം പണിഞ്ഞ് ഈ സ്ഥലത്തും ഭാവിയില് സൗകര്യം ഏര്പ്പെടുത്താവുന്നതാണെന്നും അദ്ദേഹം പറഞ്ഞു. ബലിക്കടവുകളില് ഏര്പ്പെടുത്തിയ സൗകര്യങ്ങള്, പുതിയ കടവുകളുടെ നിര്മ്മാണം, ശുചീകരണം തുടങ്ങിയവ ചീഫ് സെക്രട്ടറി വിലയിരുത്തി.
ജില്ലാ കളക്ടര് ബിജു പ്രഭാകര്, സബ് കളക്ടര് ഡോ.എസ്. കാര്ത്തികേയന്, ശുചിത്വമിഷന് എക്സിക്യുട്ടീവ് ഡയറക്ടര് ഡോ. കെ. വാസുകി, മറ്റ് ഉദ്യോഗസ്ഥര്, ക്ഷേത്രഭാരവാഹികള് തുടങ്ങിയവര് അദ്ദേഹത്തിനൊപ്പമുണ്ടായിരുന്നു.
Discussion about this post