തിരുവനന്തപുരം: കോവളം തീരത്ത് കൂടുതല് സുരക്ഷാസംവിധാനങ്ങളൊരുക്കാന് തീരുമാനം. കോവളത്ത് യുവാക്കളെ കടലില് കാണാതായ സംഭവവുമായി ബന്ധപ്പെട്ട് കളക്ടറുടെ അധ്യക്ഷതയില് ചേര്ന്ന പോലീസ്, കോസ്റ്റ് ഗാര്ഡ്, റവന്യൂ അധികൃതര്, പാരിഷ്, പള്ളി പ്രതിനിധികള് തുടങ്ങിയവരുടെ യോഗത്തിലാണ് തീരുമാനം.
തീരത്ത് അപകടസാധ്യതയുള്ള സ്ഥലങ്ങളില് മൈക്ക് അനൗണ്സ്മെന്റ് നടത്തും. വൈകിട്ട് ആറുമണിക്ക്ശേഷം കടലില് ഇറങ്ങാന് ആരെയും അനുവദിക്കില്ല. അപകടസാധ്യതയുള്ള സ്ഥലങ്ങളില് അപായസൂചന ബോര്ഡുകള് വിവിധ ഭാഷകളില് സ്ഥാപിക്കാന് തീരുമാനിച്ചു. പാറക്കൂട്ടത്തിനടുത്തേക്ക് രാത്രി ആരെങ്കിലും പോകുകയാണെങ്കില് തീരത്ത് അറിയാന് ഈ മേഖലയില് ലൈറ്റുകള് സ്ഥാപിക്കും. വാച്ച് ടവര് സ്ഥാപിച്ച് കടലില് ഇറങ്ങുന്നവരെ നിരീക്ഷിക്കുന്നതിന് സംവിധാനമൊരുക്കും. കാണാതായ യുവാക്കള്ക്കായി കുളച്ചല് ഭാഗത്ത് പരിശോധനയ്ക്ക് കന്യാകുമാരി ജില്ലാ കളക്ടറുടെ സഹായം തേടിയിട്ടുണ്ട്. ഇതുകൂടാതെ കോസ്റ്റ് ഗാര്ഡ് ഉള്പ്പെടെയുള്ളവര് തിരച്ചില് തുടരുന്നുണ്ട്. മല്സ്യബന്ധനത്തിനത്തിനിടെ കാണാതായവരെക്കുറിച്ച് വിവരം ലഭിച്ചാല് തൊഴിലാളികള് ഉടന് അറിയിക്കണമെന്നും കളക്ടര് അറിയിച്ചു. ഡി.സി.പി കെ. സഞ്ജയ് കുമാര് ഗുരുഡിന്, ഫോര്ട്ട് അസി. കമ്മീഷണര് സുധാകരന് പിള്ള, കൗണ്സിലര് ഗ്ളാഡിസ് അലക്സ്, കോസ്റ്റ് ഗാര്ഡ് അധികൃതര്, പാരിഷ്-പള്ളി പ്രതിനിധികള് തുടങ്ങിയവര് യോഗത്തില് സംബന്ധിച്ചു.
Discussion about this post