കൊച്ചി: അഡ്വക്കറ്റ് ജനറല് ഓഫീസിനെക്കുറിച്ചും സര്ക്കാര് അഭിഭാഷകരെക്കുറിച്ചും തുറന്ന കോടതിയില് നടത്തിയ നിരീക്ഷണങ്ങളെപ്പറ്റി ചീഫ്ജസ്റ്റീസ് അശോക് ഭൂഷണ് ജസ്റ്റീസ് അലക്സാണ്ടര് തോമസിനോട് വിശദീകരണം തേടി. അഡ്വക്കറ്റ് ജനറല് കെ.പി. ദണ്ഡപാണി, പ്രോസിക്യൂഷന്സ് ഡയറക്ടര് ജനറല് ടി. അസഫ് അലി, അഡീഷണല് അഡ്വക്കറ്റ് ജനറല് കെ.എ. ജലീല് എന്നിവര് വ്യാഴാഴ്ച ചീഫ് ജസ്റ്റീസിനെ ചേംബറില് ചെന്നു കണ്ടു പരാതി നല്കിയ സാഹചര്യത്തിലാണിത്.
ഹൈക്കോടതിയിലെ അഞ്ചു മുതിര്ന്ന ജഡ്ജിമാര് ഇന്നലെ രാവിലെ യോഗം ചേര്ന്നു പരാതി സംബന്ധിച്ചു വിലയിരു ത്തി. ഉച്ചയ്ക്കു ചീഫ് ജസ്റ്റീസ് അശോക് ഭൂഷണ് ജസ്റ്റീസ് അലക്സാണ്ടര് തോമസി നെ ചേംബറിലേക്കു വിളിച്ചുവരുത്തി വിവരങ്ങള് ആരാഞ്ഞു.
ഹൈക്കോടതിയിലെ സര്ക്കാര് അഭിഭാഷകരും ഇന്നലെ ചീഫ് ജസ്റ്റീസിനു പരാതിയും നല്കി. ഹൈക്കോടതിയിലെ സീനിയര് ഗവണ്മെന്റ് പ്ലീഡര്മാരായ പി.ഐ. ഡേവിസ്, എസ്. സുധീര്കുമാര് എന്നിവരാണു ചീഫ്ജസ്റ്റീസിന്റെ ചേംബറിലെത്തി പരാതി കൈമാറിയത്. ഹൈക്കോടതിയിലെ സര്ക്കാര് അഭിഭാഷകര്ക്കെതിരായ വ്യക്തിനിഷ്ഠവും നിരുത്തരവാദപരവുമായ ജഡ്ജിയുടെ പ്രസ്താവന വേദനിപ്പിച്ചതായി പരാതിയില് പറയുന്നു.
സര്ക്കാരിനും മുഖ്യമന്ത്രിക്കും അഡ്വക്കറ്റ് ജനറലിനും ഗവണ്മെന്റ്പ്ലീഡര്മാര്ക്കുമെതിരായ അനുചിത പരാമര്ശങ്ങള് കോടതിയുടെ പരിഗണനയിലുള്ള കേസുമായി ബന്ധമില്ലാത്തവയാണ്. അഭിഭാഷകര്ക്കെതിരേ കോടതിയില് സിംഗിള് ജഡ്ജി നടത്തുന്ന പ്രസ്താവനകള് പലതും അനാവശ്യമായതോ ആ ണ്. സര്ക്കാര് അഭിഭാഷകരുടെ, പ്രത്യേകിച്ച് അഡ്വക്കറ്റ് ജനറലിന്റെ, സ്വഭാവം, കഴിവ്, പ്രതിബദ്ധത എന്നിവയെക്കുറിച്ചുപോലും ജഡ്ജി പ്രസ്താവന നടത്തി.
ബാര് അസോസിയേഷനും ഹൈക്കോടതി ബെഞ്ചും തമ്മിലുള്ള ബന്ധം വഷളാകരുതെന്നോര്ത്ത് ഒന്നും മിണ്ടാതിരിക്കേണ്ട ഗതികേടിലാണു ഹൈക്കോടതിയിലെ സര്ക്കാര് അഭിഭാഷകര്. വനിതാ ഗവ.പ്ലീഡര്മാര് പലപ്പോഴും കരഞ്ഞുകൊണ്ടാണ് ഈ കോടതി മുറിയില്നിന്നു പുറത്തുവരുന്നത്. ക്രമപ്രകാരമല്ല ഈ ബെഞ്ചില് കേസ് പരിഗണിക്കുന്നത്. ഇത്തരത്തില് ഹര്ജികള് പരിഗണിക്കുമ്പോള് ഗവ. പ്ലീഡര്മാര്ക്കു ബുദ്ധിമുട്ടേറുന്നു. ഗവ.പ്ലീഡര്മാരുടെ ആത്മവിശ്വാസം നഷ്ടപ്പെടുത്തുന്ന തരത്തിലാണു പലപ്പോഴും പരാമര്ശങ്ങള് ഉണ്ടാകുന്നത്.
ഇടതുമുന്നണി ഭരണകാലത്തു ഗവണ്മെന്റ് പ്ലീഡറായി ജോലിചെയ്ത വ്യക്തി എന്ന നിലയില് ജഡ്ജി പലപ്പോഴും ഇന്നത്തെ സര്ക്കാര് അഭിഭാഷകരെ എല്ഡിഎഫ് കാലത്തെ ഗവ.പ്ലീഡര്മാരുമായി താരതമ്യം ചെയ്യുന്ന തരത്തിലാണു പരാമര്ശം നടത്തുന്നത്. ഇവ മാധ്യമങ്ങളില് വാര്ത്തയാകുന്നു. അനാവശ്യമായി അഭിഭാഷകരെയും അഡ്വക്കറ്റ് ജനറല് ഓഫീസിനെയും കുറ്റപ്പെടുത്തുന്ന പ്രവണത തടയേണ്ടതുണെ്ടന്നും സര്ക്കാര് അഭിഭാഷകര് സമര്പ്പിച്ച പരാതിയില് പറയുന്നു. അഡ്വക്കറ്റ് ജനറലിന്റെ ഓഫീസുമായി ബന്ധപ്പെട്ട ജഡ്ജിയുടെ പരാമര്ശങ്ങള്ക്കെതിരേ ഗവര്ണര്ക്കും രാഷ്ട്രപ തിക്കും പരാതി നല്കുന്നുണ്ട്.
പ്രശ്നപരിഹാരത്തിനു നടപടി സ്വീകരിക്കുമെന്നും ഹൈക്കോടതിയിലെ സീനിയര് ജഡ്ജിമാര് ഉള്പ്പെടെയുള്ളവര് വസ്തുതകള് വിലയിരുത്തുന്നുണെ്ടന്നും ചീഫ് ജസ്റ്റീസിന്റെ കാര്യാലയത്തില്നിന്നു ഉറപ്പുലഭിച്ചതായി സര്ക്കാര് അഭിഭാഷകരുടെ വക്താവ് അറിയിച്ചു. അഡ്വക്കറ്റ് ജനറലിന്റെ ഓഫീസ് അടച്ചുപൂട്ടണമെന്ന പരാമര്ശത്തിനെതിരേ എജി ഓഫീസ് ജീവനക്കാരും പരാതി നല്കുമെന്ന് അറിയിച്ചിട്ടുണ്ട്.
Discussion about this post