തിരുവനന്തപുരം: പൊതുജനാരോഗ്യരംഗത്ത് മാതൃകാപരമായ പ്രവര്‍ത്തനം കാഴ്ചവയ്ക്കുന്ന 27,000 ആശമാരുടെ പ്രവര്‍ത്തന മേഖല വിപുലപ്പെടുത്തി അവര്‍ക്ക് സാമ്പത്തികനേട്ടമുണ്ടാക്കുന്ന ബൃഹത് പദ്ധതി സംസ്ഥാനത്ത് നടപ്പിലാക്കുമെന്ന് മുഖ്യമന്ത്രി ഉമ്മന്‍ചാണ്ടി അറിയിച്ചു.
ബുദ്ധിമാന്ദ്യം, സെറിബ്രല്‍ പാള്‍സി, മുതലായ അസുഖങ്ങള്‍ ബാധിച്ച കുട്ടികളെ ഭവനസന്ദര്‍ശനങ്ങളിലൂടെ കണ്ടെത്തി സര്‍ക്കാര്‍ സേവനം ലഭ്യമാക്കുന്നതിന് സഹായിക്കുന്ന ദൗത്യമാണ് ആശമാര്‍ക്ക് നല്‍കുകയെന്നും അദ്ദേഹം പറഞ്ഞു. തിരുവനന്തപുരം സെന്‍ട്രല്‍ സ്റ്റേഡിയത്തില്‍ ആശമാര്‍ക്ക് ഇന്‍ഷ്വറന്‍സ് പരിരക്ഷ ലഭ്യമാക്കുന്ന ആരോഗ്യവകുപ്പിന്റെ ആശാകിരണം പദ്ധതിയുടെ സംസ്ഥാനതല ഉദ്ഘാടനം നിര്‍വ്വഹിച്ച് പ്രസംഗിക്കുകയായിരുന്നു അദ്ദേഹം.
കേരളത്തിന്റെ ആരോഗ്യസൂചികകള്‍ വികസിതരാജ്യങ്ങളുടേതിന് സമാനമായി ഉയര്‍ത്തുന്നതില്‍ ആശമാര്‍ വഹിക്കുന്ന പങ്ക് വിലമതിക്കാനാവാത്തതാണെന്ന് ആരോഗ്യമന്ത്രി വി.എസ്. ശിവകുമാര്‍ അധ്യക്ഷപ്രസംഗത്തില്‍ പറഞ്ഞു. മാതൃ-ശിശുമരണനിരക്കുകള്‍ ഗണ്യമായി കുറയ്ക്കുന്നതിലും പകര്‍ച്ചവ്യാധികള്‍ നിയന്ത്രിക്കുന്നതിലും ആശമാര്‍ വഹിക്കുന്ന പങ്ക് വളരെ വലുതാണ്. ഇവര്‍ക്ക് വിവിധ പദ്ധതികളില്‍നിന്നുള്ള ഇന്‍സെന്റീവുകളും സംസ്ഥാനസര്‍ക്കാരിന്റെ പ്രതിമാസ ഓണറേറിയവും ക്രമാനുഗതമായി വര്‍ദ്ധിപ്പിക്കുന്നതില്‍ സര്‍ക്കാര്‍ പ്രത്യേകശ്രദ്ധ പുലര്‍ത്തുന്നുണ്ട്. 2011 ല്‍ 300 രൂപയായിരുന്ന പ്രതിമാസ ഓണറേറിയം ഘട്ടം ഘട്ടമായി ആയിരം രൂപയാക്കി വര്‍ദ്ധിപ്പിച്ചു. ആശാകിരണം പദ്ധതി ഇന്ത്യക്കുതന്നെ മാതൃകയാണ്. അപകടമരണം സംഭവിക്കുന്ന ആശയുടെ ആശ്രിതര്‍ക്ക് രണ്ട് ലക്ഷം രൂപയും, പൂര്‍ണ്ണമായി അംഗവൈകല്യം സംഭവിച്ച ആശയ്ക്ക് രണ്ട് ലക്ഷം രൂപയും, ഭാഗികമായ അംഗവൈകല്യത്തിന് ഒരു ലക്ഷം രൂപയും, അപകടത്തെത്തുടര്‍ന്നുള്ള ആശുപത്രിച്ചെലവിന് 10,000 രൂപയും പദ്ധതിപ്രകാരം ലഭിക്കും.
മരണാനന്തര സംസ്‌കാര ച്ചെലവിലേക്ക് 50,000 രൂപ ആശ്രിതര്‍ക്ക് അനുവദിക്കും. അപകടത്തില്‍ മരിച്ച ആശമാരുടെ മക്കള്‍ക്ക് 2,000 രൂപയുടെ വാര്‍ഷിക വിദ്യാഭ്യാസ സ്‌കോളര്‍ഷിപ്പ് ലഭിക്കും. പൊതുമേഖലാസ്ഥാപനമായ യുണൈറ്റഡ് ഇന്ത്യാ ഇന്‍ഷുറന്‍സ് കമ്പനി മുഖേനയാണ് ഇത് നടപ്പിലാക്കുന്നതെന്ന് മന്ത്രി പറഞ്ഞു. ആശമാര്‍ക്ക് പ്രതിമാസ ഓണറേറിയം നല്‍കുന്നതിനായി 21 കോടി രൂപ അനുവദിച്ചതായി ധനമന്ത്രി കെ.എം. മാണി അറിയിച്ചു. പനിബാധിച്ചു മരിച്ച മലപ്പുറം ജില്ലയിലെ രുഗ്മിണിയുടെയും പുഷ്പലതയുടെയും കുടുംബങ്ങള്‍ക്കുള്ള ആശാകിരണം ആനുകൂല്യവിതരണം നിര്‍വ്വഹിച്ചു പ്രസംഗിക്കുകയായിരുന്നു അദ്ദേഹം. മികച്ച ആശയ്ക്കുള്ള സംസ്ഥാന അവാര്‍ഡ് എറണാകുളം കുട്ടമ്പുഴ ബ്ലോക്കിലെ വത്സല ജോര്‍ജ്ജിന് മന്ത്രി എം.കെ. മുനീറും പ്രത്യേക അവാര്‍ഡ് ആലപ്പുഴ ചെട്ടിക്കാട് പി.എച്ച്.സിയിലെ ജെസി ക്ലീറ്റസിന് മന്ത്രി കെ.പി. മോഹനനും സമ്മാനിച്ചു. ജില്ലാതല അവാര്‍ഡുകള്‍ മേയര്‍ കെ. ചന്ദ്രികയും ചലച്ചിത്രതാരം അനുശ്രീയും വിതരണം ചെയ്തു. ആശാകിരണം പദ്ധതി ആവിഷ്‌ക്കരിച്ച എന്‍എച്ച്എം സ്റ്റേറ്റ് അഡ്മിനിസ്‌ട്രേറ്റീവ് മാനേജര്‍ പി.കെ. ഹരികൃഷ്ണന് മുഖ്യമന്ത്രി ഉപഹാരം നല്‍കി.
ആരോഗ്യവകുപ്പ് ഡയറക്ടര്‍ ഡോ. എസ്. ജയശങ്കര്‍, ഡെപ്യൂട്ടി ഡയറക്ടര്‍ ഡോ. ജി. സുനില്‍കുമാര്‍, കൗണ്‍സിലര്‍ ആര്‍. ഹരികുമാര്‍, യുണൈറ്റഡ് ഇന്ത്യ ഇന്‍ഷുറന്‍സ് റീജിയണല്‍ മാനേജര്‍ ഡോ. ബി. ബൈജു. ഡിഎംഒ ഡോ. നിതാവിജയന്‍, ഡിപിഎം ഡോ.ബി. ഉണ്ണിക്കൃഷ്ണന്‍ എന്നിവര്‍ പ്രസംഗിച്ചു.
Discussion about this post