തിരുവനന്തപുരം: സംസ്ഥാന സര്ക്കാരിന്റെ പ്രത്യേക ക്ഷണം സ്വീകരിച്ച് ചൈനീസ് അംബാസഡര് ലിയുചെങ്ങ് ഉള്പ്പെടെ അഞ്ചംഗ ഉന്നതതല സംഘം കേരളം സന്ദര്ശിക്കും. ആഗസ്റ്റ് ഏഴ് മുതല് 10 വരെയാകും ചൈനീസ് സംഘം കേരളത്തിലുണ്ടായിരിക്കുക.
ഏഴിന് കൊച്ചിയിലെത്തുന്ന അംബാസഡറും സംഘവും അന്ന് കുമരകത്ത് തങ്ങും. എട്ടിന് കുമരകത്ത് നിന്നും ഹൗസ് ബോട്ടില് സംഘം നെഹ്റു ട്രോഫി വളളം കളിയുടെ വേദിയിലെത്തും. എട്ടിനും ഒന്പതിനും കൊച്ചിയില് തങ്ങുന്ന ഇവര് പത്തിന് എറണാകുളം ഗവണ്മെന്റ് ഗസ്റ്റ് ഹൗസില് മുഖ്യമന്ത്രി ഉമ്മന്ചാണ്ടിയുമായി ചര്ച്ച നടത്തും. തുടര്ന്ന് പത്ര സമ്മേളനം നടത്തുമെന്നും ചീഫ് സെക്രട്ടറി അറിയിച്ചു. ഇക്കഴിഞ്ഞ ജൂണില് കേരള ടൂറിസം ബീജിംഗില് നടന്ന ബീജിംഗ് ഇന്റര്നാഷണല് ടൂറിസം എക്സ്പോയില് സ്വന്തം പവലിയനുമായി പങ്കെടുത്തിരുന്നു. കേരളത്തില് നിന്നുള്ള നിരവധി കമ്പനികള് ഈ മേളയില് പങ്കെടുത്തു. തുടര്ന്ന് ബീജിംഗിലെ ഇന്ത്യന് എംബസിയില് കളരിപ്പയറ്റും കഥകളിയുമുള്പ്പെടെ കേരള സന്ധ്യ സംഘടിപ്പിക്കുകയും ഇതില് ബീജിംഗിലെ പ്രമുഖ ടൂര് ഓപ്പറേറ്റര്മാരും എംബസി പ്രതിനിധികളും പങ്കെടുക്കുകയും ചെയ്തിരുന്നു. ജൂണ് 30 ന് ഇതിന്റെ തുടര്ച്ചയെന്നോണം ഷാങ്ഹായില് കേരള ടൂറിസം വന് പങ്കാളിത്തത്തോടെ ഒരു റോഡ്ഷോ സംഘടിപ്പിക്കുകയും ചെയ്തു. ഈ വിപണന സംരംഭങ്ങളുടെ തുടര്ച്ചയെന്നോണമാണ് നെഹ്റു ട്രോഫി വളളംകളി നടക്കുന്ന വേളയില് ചൈനീസ് അംബാസഡറേയും സംഘത്തേയും ക്ഷണിച്ചിരുന്നുതെന്നും ചീഫ് സെക്രട്ടറി അറിയിച്ചു. ചൈനീസ് അംബാസഡറുടെ കേരള സന്ദര്ശനം ചൈനീസ് ടൂറിസ്റ്റുകളിലും ടൂര് ഓപ്പറേറ്റര്മാരിലും കേരളത്തെക്കുറിച്ച് കൂടുതല് മതിപ്പുണ്ടാക്കുന്നതിന് സഹായകമാകും. അതുവഴി കൂടുതല് ചൈനീസ് ടൂറിസ്റ്റുകളെ കേരളത്തിലേക്കാകര്ഷിക്കാന് കഴിയുകയും ചെയ്യും. ചൈനീസ് ടൂറിസം വിപണി കേന്ദ്രീകരിച്ച് കേരള ടൂറിസം കൂടുതല് പദ്ധതികള് ആവിഷ്കരിക്കും. മാര്ക്കറ്റിങ് കൂടുതല് ഊര്ജ്ജസ്വലമാക്കി ടൂറിസ്റ്റുകളെ കൂടുതലായി ആകര്ഷിക്കാനുളള ശ്രമങ്ങള് തുടരുമെന്ന് ചീഫ് സെക്രട്ടറി ജിജി തോംസണ് അറിയിച്ചു.
Discussion about this post