* സിറ്റി ഓട്ടോകള്ക്ക് മഞ്ഞനിറം: നവംബര് ഒന്നുമുതല് നടപ്പാക്കും
* സിറ്റി പെര്മിറ്റ് 30,000 വരെ ആക്കണമെന്ന് സര്ക്കാരിനോട് അഭ്യര്ഥിക്കും
തിരുവനന്തപുരം: വിവിധ കോ-ഓപ്പറേറ്റീവ് സൊസൈറ്റികള്ക്ക് സ്വകാര്യ ബസ് സര്വീസിന് നല്കിയിട്ടുള്ള പെര്മിറ്റുകള് സംബന്ധിച്ച് അന്വേഷണം നടത്തി റിപ്പോര്ട്ട് സമര്പ്പിക്കാന് സിറ്റി പോലീസ് കമ്മീഷണര്ക്ക് റീജിയണല് ട്രാന്സ്പോര്ട്ട് അതോറിറ്റി യോഗം നിര്ദേശം നല്കി. തിരുവനന്തപുരം നഗരത്തില് സര്വീസ് നടത്താന് പെര്മിറ്റുള്ള ഓട്ടോകളുടെ നിറംമാറ്റം നവംബര് ഒന്നിനുതന്നെ നടപ്പാക്കാനും തീരുമാനമായി.
കോ-ഓപ്പറേറ്റീവ് സൊസൈറ്റികള്ക്ക് സ്വകാര്യ ബസ് സര്വീസിന് നല്കിയിട്ടുള്ള പെര്മിറ്റുകള് സംബന്ധിച്ചും അവയുടെ നടത്തിപ്പ് സംബന്ധിച്ചും അന്വേഷണം നടത്താന് സിറ്റി പോലീസ് കമ്മീഷണറെ യോഗം ചുമതലപ്പെടുത്തി. പ്രാഥമികാന്വേഷണം നടത്തി ഏഴുദിവസത്തിനുള്ളില് റിപ്പോര്ട്ട് സമര്പ്പിക്കണം. സൊസൈറ്റികള്ക്ക് ലഭിച്ച പെര്മിറ്റുകള് പ്രകാരം അവര് തന്നെയാണ് സര്വീസ് നടത്തുന്നത് എന്ന് ഉറപ്പാക്കും. കൃത്യമായി സാമ്പത്തികരേഖകളോ, മറ്റ് നടപടിക്രമങ്ങളോ പാലിക്കാതെ നടത്തുന്ന ഇത്തരം സര്വീസുകള് അന്വേഷണത്തിന് ശേഷം റദ്ദാക്കും. ലീസിനു നല്കിയിട്ടുള്ള പെര്മിറ്റുകള് സംബന്ധിച്ച രേഖകള് ഹാജരാക്കിയില്ലെങ്കില് റദ്ദാക്കും. സാമ്പത്തികക്രമക്കേട് ഉള്പ്പെടെയുള്ള പരാതികള് വിവിധ സൊസൈറ്റികളെപ്പറ്റി ലഭിച്ചതിന്റെ അടിസ്ഥാനത്തിലാണ് അന്വേഷണം.
സിറ്റി ഓട്ടോകളുടെ നിറംമാറ്റം നവംബര് ഒന്നിനുതന്നെ നടപ്പാക്കും. മുന്വശത്ത് കൂടുതല് ഭാഗം മഞ്ഞനിറമാക്കാനാണ് കഴിഞ്ഞ ആര്.ടി.എ യോഗത്തില് തീരുമാനിച്ചിരുന്നത്. എന്നാല്, ഓട്ടോത്തൊഴിലാളി സംഘടനകളുടെ കൂടി നിര്ദേശം പരിഗണിച്ച് മുന്വശത്ത് മഞ്ഞനിറം ഏതു പാറ്റേണിലായിരിക്കണമെന്നത് ഉടന് തീരുമാനമെടുക്കുമെന്ന് ആര്.ടി.എ ചെയര്മാന് കൂടിയായ ജില്ലാ കളക്ടര് ബിജു പ്രഭാകര് അറിയിച്ചു. നിലവില് 4550 ഓട്ടോകള്ക്കാണ് നഗരത്തില് സര്വീസിന് പെര്മിറ്റുള്ളത്. യാത്രാക്ലേശം പരിഹരിക്കാന് 1995ല് അനുവദിച്ച ഈ പെര്മിറ്റുകളുടെ എണ്ണം കൂട്ടി 30,000 വരെ ആക്കണമെന്ന് സര്ക്കാരിനോട് അഭ്യര്ഥിക്കാന് യോഗം തീരുമാനിച്ചു. സര്ക്കാര് അനുമതിക്ക് ശേഷം പുതിയ സിറ്റി പെര്മിറ്റുകള് നല്കാന് ആഗസ്റ്റ് 11വരെ രജിസ്റ്റര് ചെയ്ത ഓട്ടോകളെ മാനദണ്ഡങ്ങള്ക്ക് വിധേയമായി മുന്ഗണനാക്രമത്തില് പരിഗണിക്കും. പെര്മിറ്റ്, നിറത്തിന്റെ ശൈലി സംബന്ധിച്ച വിഷയങ്ങളില് ഈമാസം 18നകം നിര്ദേശങ്ങള് നല്കണമെന്ന് സംഘടനകളോട് കളക്ടര് നിര്ദേശിച്ചു. ഓണത്തിന്മുമ്പ് ചര്ച്ചകള്ക്ക് ശേഷം അന്തിമതീരുമാനമെടുക്കും.
റോഡ് നിയമങ്ങള് പാലിക്കാത്ത ബസുകളുടെ പെര്മിറ്റും ഡ്രൈവര്മാരുടെ ലൈസന്സും റദ്ദാക്കാനുള്ള കഴിഞ്ഞ ആര്.ടി.എ യോഗതീരുമാനം കര്ശനമായി നടപ്പാക്കാനും കളക്ടര് നിര്ദേശിച്ചു. യോഗത്തില് സിറ്റി പോലീസ് കമ്മീഷണര് എച്ച്. വെങ്കിടേഷ്, ഡെപ്യൂട്ടി ട്രാന്സ്പോര്ട്ട് കമ്മീഷണര് എന്.കെ. രവീന്ദ്രനാഥന്, തിരുവനന്തപുരം ആര്.ടി.ഒ തുളസീധരന് പിള്ള, ആറ്റിങ്ങല് ആര്.ടി.ഒ പി.എം. ഷാജി, പൊലീസ് ഉദ്യോഗസ്ഥര്, കെ.എസ്.ആര്.ടി.സി, സ്വകാര്യബസ് പ്രതിനിധികള് തുടങ്ങിയവര് പങ്കെടുത്തു.
Discussion about this post