ന്യൂഡല്ഹി: സ്വാതന്ത്ര്യദിനത്തോടനുബന്ധിച്ചു ബിജെപി ഓഫീസുകളില് ഭീകരാക്രമണത്തിനു സാധ്യതയെന്നു സുരക്ഷാ ഏജന്സികളുടെ മുന്നറിയിപ്പ്. 26/11 മുബൈ ഭീക്രരാക്രമണത്തിന്റെ രീതിയില് ഭീകരര് കടല് വഴിയെത്തി ആക്രമിക്കാന് സാധ്യതയുണ്ട്. ആക്രമണസാധ്യത നിലനില്ക്കുന്നതിനാല് സേനകള് അതീവ ജാഗ്രത പുലര്ത്തണമെന്നും ഏജന്സികള് വ്യക്തമാക്കി.
രാജ്യത്തു ഭീകരാക്രമണത്തിനു സാധ്യതയുള്ളതായി കേന്ദ്ര ആഭ്യന്തരമന്ത്രാലയവും മുന്നറിയിപ്പ് നല്കിയിരുന്നു. സിമി, ഇന്ത്യന് മുജാഹിദീന്, ജയ്ഷ്-ഇ-മുഹമ്മദ്, തെഹ്രിക് ഇ-ഫര്ഖാന്, ലഷ്കര്-ഇ-തയ്ബ. പസ്ബാന്-ഇ-അഹ്ല ഹാദിസ് എന്നീ ഭീകര സംഘടനകളുടെ ആക്രമണത്തിനാണു സാധ്യതയെന്നും ആഭ്യന്തരമന്ത്രാലയം അറിയിച്ചിരുന്നു. ഭീകരര് ആകാശമാര്ഗത്തില് എത്തി ഉന്നതപദവിയിലുള്ളവരെ അടക്കം ആക്രമിക്കാന് ലക്ഷ്യമിടുന്നതിനാല് അതീവജാഗ്രത പാലിക്കാന് നിര്ദേശിച്ചിരുന്നു.
ഇന്ത്യയിലെ വിവിധ സംസ്ഥാനങ്ങളിലെ ബിജെപി പാര്ട്ടി ഓഫീസുകള്, വ്യാപാരസമുച്ചയങ്ങള്, വിനോദ സഞ്ചാരകേന്ദ്രങ്ങള്, ആരാധനാലയങ്ങള്, റെയില്വേ സ്റ്റേഷനുകള് എന്നിവ ആക്രമിക്കാന് പദ്ധതിയുള്ളതായി കഴിഞ്ഞ സെപ്റ്റംബറില് അല്-ക്വയ്ദയും വെളിപ്പെടുത്തിയിരുന്നു. കഴിഞ്ഞമാസം പഞ്ചാബിലെ ഗുരുദാസ്പുരില് ഭീകരാക്രമണമുണ്ടായിരുന്നു. ഈ പശ്ചാത്തലത്തില് അതിര്ത്തിയില് 50,000 സൈനികരെ കൂടുതലായി വിന്യസിച്ചിട്ടുണ്ട്.
Discussion about this post