തിരുവനന്തപുരം: കേരളത്തിലെ സാധ്യതകളും അവസരങ്ങളും പ്രയോജനപ്പെടുത്തിയാല് കേരളത്തില്തന്നെ പുതിയ സംരംഭങ്ങള് തുടങ്ങാനും പ്രവര്ത്തിക്കാനും അവസരമുണ്ടാകുമെന്നും അതിനുവേണ്ടിയാണ് സംസ്ഥാനസര്ക്കാര് പ്രവര്ത്തിക്കുന്നതെന്നും മുഖ്യമന്ത്രി ഉമ്മന്ചാണ്ടി പറഞ്ഞു.
2012-ലെ വിദ്യാര്ത്ഥി സംരംഭകത്വ നയത്തിന്റെ അടിസ്ഥാനത്തില് 100-ലധികം സംരംഭങ്ങള് വിജയകരമായി ഇപ്പോഴും പ്രവര്ത്തിച്ചുവരുന്നതായി മുഖ്യമന്ത്രി പറഞ്ഞു. തിരുവനന്തപുരം എഞ്ചിനീയറിങ് കോളേജിലെ വിവിധ പരിപാടികളുടെ ഉദ്ഘാടനം നിര്വ്വഹിച്ച് സംസാരിക്കുകയായിരുന്നു മുഖ്യമന്ത്രി. എഞ്ചിനീയറിങ് കോളേജ് വിദ്യാര്ത്ഥിനിയായിരുന്ന തസ്നി ബഷീറിന്റെ മരണം പോലുള്ള സംഭവങ്ങള് ആവര്ത്തിക്കാതിരിക്കാന് അതൊരുപാഠമായി വിദ്യാര്ത്ഥികള് മനസില് കരുതണം. മിതത്വവും ഉയര്ന്ന നിലവാരമുള്ള പ്രവര്ത്തനശൈലിയുമാണ് വിദ്യാര്ത്ഥികള്ക്ക് വേണ്ടത്. ബിരുദത്തിനുശേഷം കേവലം ഒരു തൊഴില് എന്നതില് നിന്നും സ്വന്തം നിലയ്ക്ക് പുതിയ മേഖലകള് കണ്ടെത്താന് വിദ്യാര്ത്ഥികള് ഇന്ന് കാണിക്കുന്ന താത്പര്യം അഭിനന്ദനീയമാണെന്നും മുഖ്യമന്ത്രി പറഞ്ഞു. ഇലക്ട്രോണിക്സ് ആന്റ് കമ്മ്യൂണിക്കേഷന് എഞ്ചിനീയറിങ് ഡിപ്പാര്ട്ട്മെന്റിന്റെ സുവര്ണജൂബിലി ലോഗോയും മുഖ്യമന്ത്രി പ്രകാശനം ചെയ്തു.
Discussion about this post