തിരുവനന്തപുരം: വനത്തിന് പുറത്ത് സെറ്റില്‍മെന്റില്‍ താമസിക്കുന്ന ആദിവാസി കുടുംബങ്ങള്‍ക്ക് ഉടന്‍ പട്ടയം നല്‍കുമെന്ന് മുഖ്യമന്ത്രി ഉമ്മന്‍ ചാണ്ടി പറഞ്ഞു. ആദിവാസികളുടെ പട്ടയം സംബന്ധിച്ച് ചര്‍ച്ച ചെയ്യാന്‍ മുഖ്യമന്ത്രിയുടെ അധ്യക്ഷതയില്‍ വിളിച്ചുചേര്‍ത്ത യോഗത്തിലാണ് തീരുമാനം.
വര്‍ഷങ്ങളായി ആദിവാസികളുന്നയിക്കുന്ന ആവശ്യത്തിനാണ് ഇതോടെ പരിഹാരമായത്. പെരിഞ്ചാംകുട്ടി പ്ലാന്റേഷനില്‍നിന്നും കുടിയൊഴിപ്പിക്കപ്പെട്ട ആദിവാസികളില്‍ അര്‍ഹരായവര്‍ക്ക് നല്‍കാന്‍ ചെങ്കുളം ഡാമിന്റെ പരിസരത്ത് 25 ഹെക്ടര്‍ സ്ഥലം റവന്യൂവകുപ്പിന് കൈമാറും. കാന്തല്ലൂര്‍, കീഴാന്തൂര്‍ പ്രദേശത്തെ അര്‍ഹരായ ആദിവാസികള്‍ക്ക് പട്ടയം നല്‍കുമെന്നും മുഖ്യമന്ത്രി അറിയിച്ചു. ഇടുക്കി ജില്ലയില്‍ പത്തുചങ്ങല പ്രദേശത്തെ കര്‍ഷക കുടുംബങ്ങള്‍ക്ക് പട്ടയം നല്‍കാനും യോഗത്തില്‍ തീരുമാനമായി. അയ്യപ്പന്‍കോവില്‍, ഉപ്പുതറ, കാഞ്ചിയാര്‍, ഇരട്ടയാര്‍, വെള്ളത്തൂവല്‍, കൊന്നത്തടി തുടങ്ങിയ പഞ്ചായത്തുകളിലെ ആയിരക്കണക്കിന് കര്‍ഷകര്‍ക്ക് ഇതിന്റെ പ്രയോജനം ലഭിക്കും. അരനൂറ്റാണ്ടായി ഉന്നയിക്കപ്പെടുന്ന പ്രശ്‌നത്തിനാണ് പരിഹാരമായത്.
റവന്യൂമന്ത്രി അടൂര്‍ പ്രകാശ്, വൈദ്യുതിമന്ത്രി ആര്യാടന്‍ മുഹമ്മദ്, വനം മന്ത്രി തിരുവഞ്ചൂര്‍ രാധാകൃഷ്ണന്‍, ഇ.എസ്.ബിജിമോള്‍ എം.എല്‍.എ., റോയ് കെ.പൗലോസ്, ആദിവാസി മേഖലകളിലെ വിവിധ സംഘടനാ പ്രതിനിധികള്‍, തുടങ്ങിയവരും ഉന്നത ഉദ്യോഗസ്ഥരും യോഗത്തില്‍ പങ്കെടുത്തു.
Discussion about this post