തിരുവനന്തപുരം: നിയമസഭാ സമുച്ചയത്തിലെ പൂന്തോട്ടത്തില് വിളഞ്ഞ കരനെല്ല് സ്പീക്കര് എന്.ശക്തനും കൃഷിവകുപ്പ് മന്ത്രി കെ.പി.മോഹനനും ചേര്ന്ന് വിളവെടുത്തു. ഉത്സവഛായയില് നടന്ന ചടങ്ങില് നിയമസഭാ ജീവനക്കാരും കര്ഷകരും പങ്കെടുത്തു.
ജീവനക്കാര്ക്കിടയിലും, പൊതുജനങ്ങളിലും കരനെല്കൃഷിയെക്കുറിച്ച് അവബോധം സൃഷ്ടിക്കുന്നതിനും, ജൈവകൃഷി പ്രോത്സാഹിപ്പിക്കുന്നതിനുമായി മെയ് മാസത്തിലാണ് നിയമസഭാ സമുച്ചയത്തില് കരനെല്കൃഷി വിളവിറക്കിയത്. ഉമ നെല്വിത്തുകള് നിയമസഭയിലെയും, കൃഷി വകുപ്പിലെയും ഉദ്യോഗസ്ഥരുടെയും, മികച്ച കര്ഷകനുള്ള പുരസ്കാരം ലഭിച്ചിട്ടുള്ള പേയാട് സ്വദേശി രാമചന്ദ്രന് നായരുടെയും പരിചരണത്തില് 120 ദിവസം കൊണ്ട് വിളഞ്ഞ് പാകമായി. ജൈവ വളവും, ജൈവ കീടനാശിനിയും ഉപയോഗിച്ചായിരുന്നു കൃഷി. നമുക്ക് ആവശ്യമായ നെല്ലും, പച്ചക്കറിയും നമ്മുടെ പറമ്പില് ഉത്പാദിപ്പിക്കുക എന്ന സന്ദേശം പ്രചരിപ്പിക്കാനാണ് നിയമസഭാ വളപ്പില് കര നെല്കൃഷി ചെയ്തതെന്ന് സ്പീക്കറും, മന്ത്രിയും അറിയിച്ചു. കര നെല്കൃഷിയിലാണ് ഏറ്റവും നല്ല നെല്ല് ഉത്പാദിപ്പിക്കാന് കഴിയുക. കര നെല്ലിന് കൂടുതല് വിളവും വിലയും ലഭിക്കുമെന്ന് മന്ത്രി കെ.പി.മോഹനന് പറഞ്ഞു. കൃഷി വകുപ്പിന്റെ ജൈവകൃഷി കാംപെയ്ന് സംസ്ഥാനത്ത് എല്ലാ വിഭാഗം ജനങ്ങളും ഏറ്റെടുത്തിരിക്കുകയാണ്. ഇത് ദേശീയതലത്തില് തന്നെ ശ്രദ്ധിക്കപ്പെട്ടിട്ടുണ്ട്. രാസവളങ്ങളുടെയും, കീടനാശിനിയുടെയും ഉപയോഗം കുറയ്ക്കണമെന്ന് കേന്ദ്ര നിര്ദ്ദേശം കേരളത്തിലെ കാംപെയ്നിന്റെ വികാരം ഉള്ക്കൊണ്ടതാണെന്നും മന്ത്രി പറഞ്ഞു. നിയമസഭ വളപ്പില് നെല്ല് വിളവെടുത്ത സ്ഥലത്ത് ഈ വര്ഷം വേങ്ങേരി വഴുതന കൃഷിചെയ്യുമെന്ന് സ്പീക്കര് അറിയിച്ചു. ഇതിനൊപ്പം പച്ചക്കറിയും, പഴവര്ഗങ്ങളും, കപ്പയും കൃഷി ചെയ്യും. നിയമസഭയില് കൃഷിക്കായുള്ള ഹരിതക്ലബ്ബില് 350 ല് അധികം അംഗങ്ങളുണ്ട്. ഇവരുടെ നേതൃത്വത്തില് കൃഷിയുടെ പ്രാധാന്യം ജനങ്ങളിലേക്ക് എത്തിക്കുന്നതിനുള്ള പ്രവര്ത്തനങ്ങള് തുടരുമെന്നും സ്പീക്കര് എന്.ശക്തന് പറഞ്ഞു.
Discussion about this post