തിരുവനന്തപുരം: പ്രധാനമന്ത്രി ഗ്രാമീണ സഡക് യോജനയില്‍ പണി പുരോഗമിക്കുന്ന 392 റോഡുകള്‍ 2016 മാര്‍ച്ചിന് മുന്‍പ് പൂര്‍ത്തിയാക്കാന്‍ നടപടി സ്വീകരിക്കുമെന്ന് ഗ്രാമവികസന മന്ത്രി കെ.സി.ജോസഫ്. പദ്ധതിക്ക് 700 കോടി രൂപയാണ് മൊത്തം ചെലവായി കണക്കാക്കുന്നത്.
നിലവിലെ കുടിശിക നല്‍കുന്നതിന് 150 കോടി രൂപ ഉടന്‍ നല്‍കാമെന്ന് കേന്ദ്ര ഗ്രാമവികസന മന്ത്രി ചൗധരി ബീരേന്ദര്‍ സിംഗുമായി ഡല്‍ഹിയില്‍ നടന്ന ചര്‍ച്ചയില്‍ ഉറപ്പു ലഭിച്ചതായി മന്ത്രി അറിയിച്ചു. കൂടാതെ നടപ്പ് വര്‍ഷം 400 കോടി രൂപ കൂടി അനുവദിക്കണമെന്ന് കേന്ദ്ര മന്ത്രിയോട് അഭ്യര്‍ത്ഥിച്ചിട്ടുണ്ട്. കഴിഞ്ഞ നാലുവര്‍ഷം പി.എം.ജി.എസ്.വൈ പദ്ധതി നടപ്പാക്കുന്നതില്‍ കേരളം കൈവരിച്ച പുരോഗതിയില്‍ കേന്ദ്രമന്ത്രി സംതൃപ്തി രേഖപ്പെടുത്തിയിട്ടുണ്ട്. സര്‍ക്കാര്‍ ചുമതലയേല്‍ക്കുമ്പോള്‍ നേരത്തേ പൂര്‍ത്തിയാക്കേണ്ടിയിരുന്ന 303 റോഡുകളുടെ പണി മുടങ്ങിക്കിടക്കുകയായിരുന്നു. തുടര്‍ന്ന് സംസ്ഥാന ഗവണ്മെന്റ് 115 കോടി രൂപ അധികമായി അനുവദിച്ചുകൊണ്ട് ടെണ്ടര്‍ അധികതുക നല്‍കിയതിലൂടെ മുടങ്ങിക്കിടന്ന പ്രവൃത്തികള്‍ പുനരാരംഭിക്കാന്‍ സാധിച്ചു. ഒന്നാംഘട്ട പ്രവൃത്തികള്‍ പുരോഗമിക്കുന്ന സാഹചര്യത്തില്‍ രണ്ടാംഘട്ടത്തില്‍ 1000 കി.മീ ഗ്രാമീണ റോഡുകള്‍ നിര്‍മ്മിക്കാന്‍ കേരളത്തിന് അനുവാദം നല്‍കണമെന്ന് ഡല്‍ഹിയില്‍ നടന്ന ചര്‍ച്ചയില്‍ കേന്ദ്ര മന്ത്രിയോട് അഭ്യര്‍ത്ഥിച്ചതായും അദ്ദേഹം പറഞ്ഞു.
