ശബരിമലയില് പോലീസ്,അഗ്നിശമനസേന എന്നിവയുടെ മൂന്നാം ബാച്ചിന്റെ സേവനമാരംഭിച്ചു. കഴിഞ്ഞതവണത്തേക്കാള് കൂടുതല് പോലീസുകാര് ഇത്തവണയുണ്ട്. മരക്കൂട്ടംവരെയുള്ള ഭാഗങ്ങളില് ഓരോ സെക്ടറുകളിലായി ഒരു ഡിവൈഎസ്പിയുടെയും മൂന്ന് സി.ഐ മാരുടെയും കീഴിലായിരിക്കും ഇവരുടെ സേവനം.
പുതുതായി ഡ്യൂട്ടിക്ക് വന്ന പോലീസുകാരുടെ ചുമതലയേല്ക്കല് ചടങ്ങ് സന്നിധാനം ശ്രീ ധര്മ്മ ശാസ്താ ഓഡിറ്റോറിയത്തില് സ്പെഷ്യല് ഓഫീസര് എസ്. സുരേന്ദ്രന് ഉദ്ഘാടനം ചെയ്തു. ശബരിമല സേവനം അയ്യപ്പസേവനം മാത്രമാണെന്നും ജോലിയായി കാണാന് പാടില്ലെന്നും അദ്ദേഹം പറഞ്ഞു. ഭക്തന്മാരോട് മോശമായി സംസാരിക്കാനോ പെരുമാറാനോ പാടില്ല. ഡ്യൂട്ടി നിശ്ചയിച്ച സ്ഥലങ്ങളില് എല്ലാ ഉദേ്യാഗസ്ഥരും കൃത്യമായി ഉണ്ടായിരിക്കണമെന്നും അദ്ദേഹം നിഷ്കര്ഷിച്ചു. തുടര്ന്ന് ഓരോ സെക്ടറുകളുടെയും ചുമതലയുള്ള ഡിവൈഎസ്പിമാര് തങ്ങളുടെ കീഴിലുള്ള പൊലീസുകാര്ക്ക് നിര്ദേശം നല്കി. എഎസ്ഒ ഡി.വത്സനും സംസാരിച്ചു.
അഗ്നിശമനസേനയുടെ മൂന്നാം ബാച്ചും സന്നിധാനത്ത് ചുമതലയേറ്റു. 8 ഫയര്പോയിന്റുകളിലായി അന്പത് അഗ്നിശമനസേനാ ജീവനക്കാര് 24 മണിക്കൂറും രക്ഷാപ്രവര്ത്തന സന്നദ്ധരായി ഉണ്ടാകും. എറണാകുളം അസിസ്റ്റന്റ് ഡിവിഷണല് ഓഫീസര് വി. സിദ്ധകുമാറിനായിരിക്കും സേനയുടെ ചുമതല. കണ്ണൂര് സ്റ്റേഷന് ഓഫീസര് കെ. രാജീവന് സന്നിധാനം സ്റ്റേഷന് ഓഫീസറുടെ ചുമതല വഹിക്കും. രക്ഷാപ്രവര്ത്തനങ്ങള്ക്ക് ബന്ധപ്പെടേണ്ട ഫോണ് നമ്പര് : 04735 202033.
Discussion about this post