പത്തനംതിട്ട: ശബരിമല തീര്ഥാടകര്ക്ക് മെച്ചപ്പെട്ട സൗകര്യങ്ങള് ഒരുക്കുന്നതിന്റെയും, മിഷന് ഗ്രീന് ശുചിത്വ പദ്ധതിയുടെയും ഭാഗമായി പമ്പയില് ജല അതോറിറ്റി അത്യാധുനിക റിവേഴ്സ് ഓസ്മോസിസ് പ്ലാന്റ് സ്ഥാപിച്ച് കിയോസ്കുകളിലൂടെ ശുദ്ധജല വിതരണം ആരംഭിക്കുന്നു. പദ്ധതിയുടെ ഉദ്ഘാടനം നാളെ (ഡിസം.10) വൈകിട്ട് 3.30 ന് ജലവിഭവ വകുപ്പ് മന്ത്രി പി.ജെ.ജോസഫ് നിര്വഹിക്കും. രാജു ഏബ്രഹാം എം.എല്.എ അധ്യക്ഷത വഹിക്കുന്ന ചടങ്ങില് ദേവസ്വം ബോര്ഡ് പ്രസിഡന്റ് പ്രയാര് ഗോപാലകൃഷ്ണന് തീര്ഥാടകര്ക്ക് ആദ്യകുടിവെള്ള വിതരണം നിര്വഹിക്കും. ജില്ലാ കളക്ടര് എസ്.ഹരികിഷോര്, ദേവസ്വം ബോര്ഡംഗങ്ങളായ പി.കെ.കുമാരന്, അജയ് തറയില്, വാട്ടര് അതോറിറ്റി എക്സിക്യൂട്ടീവ് എന്ജിനിയര് ഡി.ജയിംസ് എന്നിവര് പ്രസംഗിക്കും.
പ്രതിദിനം 24,000 ലിറ്റര് ശുദ്ധജലം പ്ലാന്റ് വഴി വിതരണം ചെയ്യും. ശബരിമലയില് ആദ്യമായാണ് ഇത്തരത്തില് ഒരു സംരംഭം ആരംഭിക്കുന്നത്. ജല അതോറിറ്റി സംസ്ഥാന പദ്ധതിയില്പെടുത്തി നാല് പ്ലാന്റുകള് സ്ഥാപിക്കുന്നതിനാണ് ലക്ഷ്യമിട്ടിരിക്കുന്നത്. ജല അതോറിറ്റിയുടെ പമ്പ സെക്ഷന് ഓഫീസ് പരിസരത്ത് സ്ഥാപിച്ചിരിക്കുന്ന പ്ലാന്റില് നിന്നും പൈപ്പുകള് സ്ഥാപിച്ച് കൂടുതല് കിയോസ്കുകള് വഴി തീര്ഥാടകര്ക്ക് കുടിവെള്ള വിതരണം നടത്താന് സാധിക്കും. ഈ പ്ലാന്റിലേക്ക് പമ്പാ നദിയിലെ സ്നാനഘട്ടത്തിനു മുകളിലുള്ള ചെക്ക് ഡാമില് നിന്നും എടുക്കുന്ന ജലം പല തലത്തിലുള്ള അരിപ്പകളിലൂടെ കടത്തിയും റിവേഴ്സ് ഓസ്മോസിസ് പ്രക്രിയ നടത്തിയശേഷം അള്ട്രാവയലറ്റ് രശ്മികള് വഴി പൂര്ണ്ണമായും അണുവിമുക്ത മാക്കിയുമാണ് വിതരണം ചെയ്യുന്നത്. സെന്ട്രല് പൊതുജന ആരോഗ്യ പരിസ്ഥിതി എന്ജിനിയറിംഗ് ഓര്ഗനൈസേഷനും ലോക ആരോഗ്യ സംഘടനയും നിഷ്കര്ഷിക്കുന്ന നിലവാരത്തിലുള്ള കുടിവെള്ളം പമ്പയിലുള്ള കേരളാ വാട്ടര് അതോറിറ്റിയുടെ തന്നെ അത്യാധുനിക ലബോറട്ടറിയില് കര്ശന പരിശോധന നടത്തിയശേഷമാണ് വിതരണം ചെയ്യുന്നത്.
ജില്ലാ കളക്ടര് എസ്.ഹരികിഷോറും വാട്ടര് അതോറിറ്റി മാനേജിംഗ് ഡയറക്ടര് അജിത് പാട്ടീല് ഭഗവത്റാവുവുമാണ് നേതൃത്വം നല്കിയത്. പ്ലാന്റ് സ്ഥാപിക്കുന്നതിന് 24 ലക്ഷം രൂപയുടെ ഭരണാനുമതി നല്കിയിരുന്നു. റിവേഴ്സ് ഓസ്മോസിസ് കിയോസ്ക് വഴി ഉന്നതനിലവാരമുള്ള കുടിവെള്ളം വിതരണം ചെയ്യുന്നതിലൂടെ പ്ലാസ്റ്റിക് കുപ്പികളുടെ ഉപയോഗം നിയന്ത്രിക്കുകയാണ് ലക്ഷ്യം.
Discussion about this post