തിരുവനന്തപുരം: സംസ്ഥാനത്തെ സഹകരണ സംഘങ്ങളിലെയും ബാങ്കുകളിലെയും വായ്പാകുടിശിക കുറയ്ക്കുന്നതിനും, കൃത്യമായ വായ്പാ തിരിച്ചടവ് പ്രോത്സാഹിപ്പിച്ച് സംഘങ്ങളെയും ബാങ്കുകളെയും പരമാവധി കുടിശിക രഹിത സ്ഥാപനങ്ങളാക്കുന്നതിനുമായി സഹകരണ മേഖലയില്‍ ആശ്വാസ് – 2016 പദ്ധതി നടപ്പാക്കുന്നതിന് സഹകരണ വകുപ്പ് മന്ത്രി സി.എന്‍. ബാലകൃഷ്ണന്‍ നിര്‍ദ്ദേശം നല്‍കി. സഹകരണ അദാലത്ത്, ഒറ്റത്തവണ തീര്‍പ്പാക്കല്‍ പദ്ധതി എന്നിങ്ങനെ രണ്ടുഘട്ടമായി നടപ്പാക്കുന്ന ഈ പരിപാടി മാര്‍ച്ച് 31 വരെ നിലവിലുണ്ടാവും.
സഹകരണ വായ്പാ സ്ഥാപനങ്ങളില്‍ ബാക്കി നില്പ്പുള്ള പത്ത് ലക്ഷം രൂപവരെയുള്ള വായ്പകുടിശിക സഹകരണ അദാലത്തിലും പത്ത് ലക്ഷം രൂപയ്ക്ക് മുകളിലുള്ള വായ്പകള്‍ ഒറ്റത്തവണ തീര്‍പ്പാക്കല്‍ പദ്ധതിയിലുമാണ് പരിഗണിക്കുന്നത്. വായ്പയെടുക്കുമ്പോള്‍ നിലവിലുണ്ടായിരുന്ന പലിശ നിരക്കോ നിലവിലുള്ള പലിശ നിരക്കോ ഏതാണ് കുറവ് ആയത് പ്രകാരമുള്ള പലിശയും ബാക്കി നില്‍പ് മുതലും ഈടാക്കി വായ്പാക്കണക്കവസാനിപ്പിക്കാന്‍ ഇതിലൂടെ വായ്പക്കാര്‍ക്ക് അവസരമുണ്ട്. സഹകാരികള്‍ തങ്ങളുടെ കടബാധ്യതയില്‍ നിന്നും റിക്കവറി ഉള്‍പ്പെടെയുള്ള നിയമ നടപടികളില്‍നിന്നും പൂര്‍ണമായും ഒഴിവാകുന്നതിന് ഈ അവസരം പരമാവധി പ്രയോജനപ്പെടുത്താം. പദ്ധതി സംബന്ധിച്ച വിശദ വിവരം www.cooperation.kerala.gov.in – ല്‍ ലഭിക്കും
Discussion about this post