തിരുവനന്തപുരം: എക്സൈസ് വകുപ്പില് എഴുപത് വനിതാ ഐക്സൈസ് സിവില് ഓഫീസര്മാരെ നിയമിക്കാന് അനുമതി നല്കിയതായും ഇതിനു പുറമേ മറ്റൊരു എഴുപത് പേരെക്കൂടി വനിത എക്സൈസ് സിവില് ഓഫീസര്മാരായി നിയമിക്കുന്ന കാര്യം അടുത്ത മന്ത്രിസഭാ യോഗത്തില് ചര്ച്ച ചെയ്യുമെന്നും എക്സൈസ് മന്ത്രി കെ. ബാബു പറഞ്ഞു. കഴക്കൂട്ടം എക്സൈസ് റേഞ്ച് ഓഫീസ് മന്ദിരത്തിന്റെയും സ്റ്റാഫ് ക്വാര്ട്ടേഴ്സിന്റെയും ഉദ്ഘാടനം നിര്വഹിച്ച് സംസാരിക്കുകയായിരുന്നു അദ്ദേഹം.
ഈ സര്ക്കാരിന്റെ കാലത്താണ് ആദ്യമായി വകുപ്പിന് പ്ളാന് ഫണ്ട് അനുവദിച്ചത് ഇതുവഴിയാണ് നവീകരണ പ്രവര്ത്തനം നടത്താനായത്. എക്സൈസ് സേവനങ്ങള് ഇ-സര്വീസ് ആയി നടപ്പാക്കുന്നതിന്റെ ഉദ്ഘാടനം ഫെബ്രുവരി അഞ്ചിന് നടക്കും. ജീര്ണ്ണാവസ്ഥയിലായിരുന്ന എക്സൈസ് ഓഫീസുകളെ പുനരുദ്ധരിച്ചത് സര്ക്കാരിന്റെ നേട്ടമാണെന്നമന്ത്രി പറഞ്ഞു. എക്സൈസ് റേഞ്ച് ഓഫീസുകള്ക്ക് സ്വന്തമായി വാഹനങ്ങള് നല്കി. ജീപ്പുകള് ചെല്ലാത്തിടത്തേക്ക് പോകാന് ബൈക്കുകള് നല്കി. മറ്റ് ഉപകരണങ്ങള് നല്കാനും നടപടി തുടങ്ങി.
13 കോടി രൂപ ചെലവില് നിര്മ്മിച്ച എറണാകുളം എക്സൈസ് കോംപ്ളക്സിന്റെ ഉദ്ഘാടനം അടുത്തമാസം നടക്കുമെന്ന് മന്ത്രി പറഞ്ഞു. ബിവറേജസ് കോര്പ്പറേഷന്റെ ആസ്ഥാന മന്ദിരം തിരുവനന്തപുരത്ത് കോ-ബാങ്ക് ടവറിന് സമീപം ജനുവരി 18 ന് രാവിലെ 10.30 ന് ഉദ്ഘാടനം ചെയ്യും. മദ്യവിപത്തിനെതിരേ കാര്യക്ഷമമായ ബോധവല്ക്കരണ പ്രവര്ത്തനമാണ് സര്ക്കാര് ലക്ഷ്യമിടുന്നത്. ലോകാരോഗ്യ സംഘടന, ഐക്യരാഷ്ട്ര സഭ എന്നിവയുമായി സഹകരിച്ച് ആഭിമുഖ്യത്തില് 17 മുതല് 19 വരെ ത്രിദിന ബോധവല്ക്കരണ സെമിനാര് സംഘടിപ്പിക്കും. കുട്ടനാട്ടില് ബോട്ടില് കായല് യാത്രയിലൂടെ ബോധവല്ക്കരണം നടത്തും. സര്ക്കാരിന്റെ മദ്യനയം സൂപ്രീം കോടതി ശരിവച്ചത് സര്ക്കാരിന്റെ പ്രവര്ത്തനങ്ങളുടെ അംഗീകാരമാണ്. സാമൂഹ്യ നന്മ ലക്ഷ്യമിട്ട് പ്രവര്ത്തിക്കുന്ന ഈ സര്ക്കാരിന്റെ കാലത്ത് മദ്യദുരന്തം ഉണ്ടായിട്ടില്ലെന്നും മന്ത്രി പറഞ്ഞു.
എം. എ വാഹിദ് എം.എല്.എ. അദ്ധ്യക്ഷത വഹിച്ച ചടങ്ങില് എക്സൈസ് കമ്മീഷണര് അനില്. എക്സ്, ഡെപ്യൂട്ടി കമ്മീഷണര് എസ് സലിം, അഡീഷണല് കമ്മീഷണര് എ. വിജയന്, അജിത് ലാല്, റ്റി.എസ്. ബൈജു തുടങ്ങിയവര് പങ്കെടുത്തു.
Discussion about this post